Elnur Məmmədli də bürünclə kifayətləndi (YENILƏNİB)
20 iyun 2011 00:10
Braziliyanın Rio-de-Janeyro şəhərində təşkil olunan cüdo üzrə “Böyük dəbilqə” turnirinə yekun vurulub. Azerisport.az xəbər verir ki, mötəbər yarışın ikinci günündə Azərbaycan yığması 4 idmançısı ilə təmsil olunub.
81 kq-da iki idmançımız mübarizə aparırdı. Daha böyük ümidlər bəslədiyimiz Elnur Məmmədli ilk görüşündə monqolustanlı Bold-Erden Odsurenlə qarşılaşıb və ipponla qələbə qazanıb. Növbəti rəqib braziliyalı Nasif Elias olub ki, həmyerlimiz yerli idmançıya da gücünü göstərməyi bacarıb. Daha sonra Elnur italiyalı Françesko Bryuyeranı da Rəcəblini məğlub etməsinə peşman edib. Nəticədə yarımfinala çıxan Məmmədlini burda yerli publikanın sevimlisi olan Leandro Qulxeyro gözləyirdi. Amma təəssüf ki, Elnur da mübarizəni məhz bu rəqibiylə dueldə dayanırmalı olub və üçüncü pilləni tutub.
Eyni çəki dərəcəsindəki digər təmsilçimiz – Elxan Rəcəbli isə startda italiyalı Françesko Bryuyera ilə münasibətlərinə aydınlıq gətirib. Təmsilçimiz ipponla uduzaraq, yarışla erkən vidalaşıb.
90 kq-da mübarizə aparan Elxan Məmmədov ilk olaraq Venesuela idmançısı Xose Kamaçonu tatamidən məğlub yola salmağı bacarıb. Növbəti rəqib polşalı Robert Kravçik idi. Məmmədov bu rəqibini də çətinlik çəkmədən keçib. 1/4 finaldakı rəqib isə kubalı Asleya Qonsales Monteyro olub ki, təmsilçimiz məhz ona məğlub olaraq, yarışı beşinci pillədə başa vurub.
100 kq-da isə Elmar Qasımov ölkəmizi layiqincə təmsil etməyə çalışıb. O, mübarizəyə ikinci mərhələdən başlayıb. Qasımovun rəqibi isə Tyerri Fabre (Fransa) olub. Amma idmançımız fransalı qarşısında ipponla uduzaraq, mübarizəni dayandırıb.
Qeyd edək ki, “Böyük dəbilqə” turniri nokaut sistemi üzrə keçirilirdi. Yarımfinalda uduzan atletlər avtomatik olaraq bürünc mükafatçı olurdular. Yarışın mükafat fondu isə 150 min dollar idi.
Maraq üçün xatırladaq ki, yarışın ilk günündə mübarizəyə qoşulan təmsilçilərimiz - Nicat Şıxəlizadə, İlqar Muşkiyev (hər ikisi 60 kq), Tərlan Kərimov (66 kq), Kifayət Qasımova (57 kq) və Ramilə Yusubovadan (63 кг) heç biri uğur qazana bilməmişdi. Yalnız sonuncu idmançımız 5-ci pilləni tutması ilə təsəlli tapmışdı.
