İlqar Muşkiyev dünya kubokunda bürünc qazandı (YENİLƏNİB)
17 sentyabr 2011 19:50
Bu gün Özbəkistanın paytaxtı Daşkənd şəhərində cüdo üzrə dünya kubokuna start verilib. Azerisport.az xəbər verir ki, yarışların ilk günündə dörd cüdoçumuz qüvvəsini sınayıb.
60 kq-da mübarizəyə qoşulan İlqar Muşkiyev startda Qazaxıstan cüdoçusu Baxıtjan Turebekovla qarşılaşıb və rəqibini ipponla məğlub edib. Növbəti mərhələdə rəqib Qasem Nurizadə (İran) idi ki, idmançımız onu da asanlıqla mübarizədən kənarlaşdırıb.1/4 finaldakı rəqibimiz Səudiyyə Ərəbistanından olan Eysa Madyraşi idi. İlqar onu da məğlub edərək, yarımfinala çıxıb. Finala çıxmaq üçün İlqar özbək Qabit Esembetovu məğlub etməliydi. Lakin o, bu rəqibinə uduzub. Buna baxmayaraq, İlqarın medal qazanmaq şansı qalırdı. Muşkiyev Şarafutdin Lyutfullayevlə (Özbəkistan) mübarizədən qalib ayrılaraq, ölkəmizə ilk medalı (bürünc) qazandırıb.
Eyni çəki dərəcəsində mübarizə aparacaq Orxan Səfərov da ilk döyüşünü Qazaxıstan cüdoçusu Yeldos Smetova qarşı keçirib. Lakin təəssüf ki, o, elə ilk cəhdindəcə məğlub olaraq, mübarizəni erkən dayandırıb.
66 kq-da mübarizə aparan Tərlan Kərimov tatami sahiblərindən Umidjon Xalilovla qarşılaşıb və qələbə qazanaraq adını 1/4 finala yazdırıb. Bu mərhələdə Tərlanı Qazaxıstandan Naruzbek Maylaşev gözləyirdi ki, idmançımız onu da məğlub etməyi bacarıb. Yarımfinaldakı rəqib fransız Dmitri Draqin isə, idmançımızın yolunu kəsməyi bacarıb. Bürünc medal üçün özbəkistanlı Mirzahid Farmonovla qarşılaşma da Kərimov üçün uğursuz alınıb və o, dünya kubokunu beşinci pillədə başa vurub.
Eyni çəki dərəcəsindəki digər təmsilçimiz Nicat Şıxəlizadə isə öncə qazax İlyaz İsmaqilovla dueldən qalib ayrılıb. 1/8 finalda onu tatami sahiblərindən Mirzahid Farmonov gözləyirdi. Təəssüf ki, Nicat məhz özbək cüdoçu ilə mübarizədən məğlub ayrılaraq, mübarizəni dayandırıb.
