Yığmamızın dünya çempionatı üçün heyəti açıqlandı
14 oktyabr 2013 00:01
23-27 oktyabr aralığında Sloveniyanın paytaxtı Lyublynada gənc cüdoçular arasında dünya birinciliyi keçiriləcək. Azerisport.az saytı xəbər verir ki, bu yarışda milli komandamız da iştirak edəcək.
Baş məşqçi Hacıağa Hacıəhmədov heyətə Mehman Sadıqov, Davud Məmmədov (hər ikisi - 55 kq), Oruc Vəlizadə, Rəşad Rufullayev (60 kq), Cəlil Cəlilov (66 kq), Afiq Səfarli, Hüseyn Rəhimli (73 kq), Abdulhaqq Rəsullu, Məmmədəli Mehdiyev (81 kq) və Firudin Dadaşovu (90 kq) daxil edib.
Təcrübəli mütəxəssis çempionat öncəsi bildirib ki, hədəf avqustda ABŞ-ın Mayami şəhərində təşkil olunan birincilikdə yeniyetmələrimizin göstərdiyi uğuru burada bir daha təkrarlamaqdı. Həmin mübarizədə Natiq Qurbanlı 50 kq-da bütün rəqiblərini məğlub edərək Azərbaycan cüdosunda ilk çempion kimi tarixə düşüb.
Gənclərdə isə, bu zəfər yaxın keçmişdə qazanılıb. İndi ustalarda çıxış edən Nicat Şıxəlizadə o zaman öz həmyaşıdlarından güclü olmuşdu.
Yeri gəlmişkən, gənclərimiz ötən Bosniya paytaxtı Sarayevada keçirilmiş qitə birinciliyində 2 qızıl və 2 bürünc medal qazanıblar.
