Rafael Ağayev: Yəni doğrudan mənim 5-ci dəfə dünya çempionu olmağımı istəməyən var?
3 oktyabr 2012 00:26
Azərbaycan karatesinin lideri Rafael Ağayev karate üzrə Azərbaycan yığmasının baş məşqçisi Rəhman Hətəmovla Azərbaycan Karate Federasiyasının iclası zamanı dalaşdıqlarına dair yayılan xəbərlərə münasibətini açıqlayıb. Azerisport.az saytına müsahibəsində o, bunları dilə gətirib:
“Karate elə idman növüdü ki, şərq fəlsəfəsinə və müdrikliyinə görə yetirmələrindən heç biri müəlliminə, məşqçisinə əl qaldıra bilməz. Rəhman Hətəmov mənim üçün təkcə yığmamızın baş məşqçisi yox, həm də böyük qardaşdı. Azərbaycan karatesində kiminsə onunla dalaşdığını təsəvvür etmək çətindi. Ona görə də bütün bu xəbərlər uydurmadı. Düzünü deyim ki, mən son vaxtlar bəzi jurnalistləri başa düşə bilmirəm. Kimisi mənim başqa ölkəyə getməyimə müxtəlif cür don geyindirir, kimisi federasiyanın iclasında dava salmağımdan yazır. Yəni doğrudan mənim beşinci dəfə dünya çempionu olmağımı istəyən yoxdu? Noyabrda bizi dünya çempionatı gözləyir. Həmin çempionata ciddi hazırlaşıram. Amma kimlərsə məni ləkəmək istəyir. Belə adamlara sadəcə onu demək istərdim ki, Azərbaycan karatesinin uğurları sizi maraqlandırmırsa, heç olmasa mane olmayın”.
