Antonio Espinoza: Rafael Ağayevin dünya karatesinin inkişafında böyük əməyi var
30 sentyabr 2013 18:35
Ümumdünya Karate Federasiyasının prezidenti Antonio Espinoza Palembanq şəhərində səfərdədi. Dünya karatesinin rəhbəri azerisport.az saytına müsahibə verib.
- İzlədiyiniz görüşlər haqda nə deyə bilərsiniz?
- Palembanqda İslam Oyunlarına maraq çoxdu. Xüsusilə karate növünə. İdmançıların fədakarcasına mübarizəsini izləyəndə çox sevinirəm. Gördüklərimdən razı qaldım. Bütün komandalar yaxşı mübarizə sərgilədi. Təbii ki, hamı qalib ola bilməz. Gərək məğlub olanda olsun. Fikrimcə, nəticələr ədalətlidi.
- Azərbaycan karateçilərinin çıxışı barədə nə deyə bilərsiniz?
- Sizin idmançılar artıq birinci gün qızıl medal qazandı. Bu gün izlədiyim görüşlərdə daha 1 qızıl medal əldə etdiniz. Uğurlarınız çoxdu. Karate Azərbaycanda çox sevilir. Çünki sizin karateçiləriniz dünyanın ən güclüləri sırasındadı.
- İki qızılı Rafael Ağayev qazandı..
- Rafael güclü və fenomemal idmançıdı. Dünya karatesinin inkişafında onun böyük rolu var. Ağayev istənilən yarışın favoritidi. Ona görə onun qələbəsi sürpriz olmadı.
- 2015-ci ildə Bakıda 1-ci Avropa Oyunları keçiriləcək. Mötəbər yarışa daxil edilən idman növləri sırasında karate də var...
- Azərbaycanda idmana dövlət səviyyəsində diqqət göstərilir. Avropa Oyunlarına az vaxt qalmasına baxmayaraq sizin böyük təcrübənizin olduğunu deməliyəm. Bütün idman növləti üzrə böyük yarışlar keçirmisiniz. Avropa Oyunlarını da yüksək səviyyədə keçirəcəyinizə əminəm. Karatenin orada olması bizi sevindirir. Bu bizim idman növü üçün əlamətdar hadisədi. Yayda Azərbaycana səfər zamanı bu barədə müzakilərimiz oldu. Fikrimcə azarkeşlər maraqlı karate görüşlərini izləyəcək.
- Karatenin yay olimpiya sıralarına düşməsi yaxın gələcəkdə reallaşa bilərmi?
- Biz bu yolda çalışırıq. Yay Olimpiya Oyunları sırasına düşmək çətin və məsuliyyətlidi. Bir sıra tələbləri həyata keçirmək lazımdı. Yaxınlarda keçiriləcək yarışlar karatenin nüfuzunu daha da artıracaq. Biz öz yolumuzdan dönməyəcəyik.
- İslam Oyunlarının təşkilatçılığı barədə nə fikirdəsiniz?
- Mən karate görüşlərini izlədim və hər şeydən razı qaldım. Bəzi kiçik nüanslar ola bilər. Amma onlar aradan qaldırılacaq. Böyük yarışları keçirmək asan deyil. Ona görə bəzən müəyyən çətinliklər üzə çıxır.
