Karateçilərimiz Boğaziçidən zəfərlə qayıdır
7 aprel 2014 11:55
Azərbaycan karateçiləri İstanbulda 27-ci Beynəlxalq “Boğaziçi” turnirini zəfərlə başa vurublar. Azerisport.az xəbər verir ki, idmançılarımız 4 qızıl, 2 gümüş və 10 bürünc medal olmaqla 16 mükafata sahib olublar.
Kişilərdən ibarət milli komandamız komanda kumite yarışının da qalibi olub.
Yarışın ilk günü yeniyetmə və gənclərdən ibarət seçmə komandalarımız 8 medal qazanıblar. Gənclər arasında dünya üçüncüsü Fəridə Əliyeva(+59 kq) 16-17 yaşlılar arasında çempion olub. Onunla bir yaş qrupunda Avropa ikincisi Ülvi Qurbanov (-55 kq), qitə çempionatının bürünc mükafatçısı Hüseyn Əliyev (-61 kq), və Asiya Məlikova (-48 kq) bürünc medallara sahib olublar.
14-15 yaşlı gənclər arasına Fidan Teymurova (-47 kq), Murad Balakişiyev (-70 kq), Murad Hacızadə (+70 kq) və Roman Heydərov (kata) də bürünc medal qazanıblar. Ümumiyyətlə yarışın ilk günü 84 medal dəstinə 4 ölkə idmançıları sahib olublar. Onlardan Türkiyə 17 qızıl, 18 gümüş və 30 bürünc olmaqla 65 medala, Səudiyyə Ərəbistanı 3 qızıl, 3 gümüş və 4 bürünc mükafata, Rumıniya isə 1 bürünc medala layiq olub.
Yarışın ikinci günü 18-20 yaşlı gənclər və böyüklərin döyüşləri keçirilib. Karateçilərimiz daha 2 qızıl, 2 gümüş və 3 bürünc medala sahib olublar. Turnirin favoritlərindən Rəfael Ağayev (-75 kq) və Niyazi Əliyev (-67 kq) çempion olublar. Rafiz Həsənovla (-67 kq) Tural Balcanlı (kata) yalnız finalda qələbəni əldən veriblər. Ayxan Mamayev (-84 kq) , Şahin Atamov və Orxan Heydərli (hər ikisi +84 kq) isə bürünc mükafatlarla kifayətlənməli olublar. Milli komandamızın üzvlərindən Niyazi Əliyevlə Rafiz Həsənov qızıl medal uğrunda, Şahin Atamovla Asiman Qurbanlı (+84 kq) isə bürünc mükafata sahib olmaq üçün mübarizə aparıblar.
Beləliklə şənbə günü Türkiyə 8 qızıl, 5 gümüş və 8 bürünc medalla birinci yerdə, Azərbaycan ikinci, İran isə 1 qızıl, 2 gümüş və 3 bürünc mükafatla üçüncülüyü qapadı. Ancaq kişilərdən ibarət milli komandamız fərdi kumitedə göstərdiyi nəticə ilə kişilər arasında bütün ölkələri geridə qoyub.
Bazar günü isə komanda kumite və komanda kata yarışları keçirilib. Azərbaycan karateçiləri həm kişi, həm də qadınların komanda kumite turnirində çıxış ediblər. Finalda İran idmançılarına 3-2 hesabı ilə qalib gələn karateçilərimiz əsas kuboka sahib olublar. Qadınların yarışında komandamız medalçılar arasına düşə bilməyib. Türkiyə komandası İranı 2-1 hesabı ilə məğlub edib. Yekunda Türkiyə birinci, Azərbaycan ikinci, Səudiyyə Ərəbistanı üçüncü nəticə göstərib. 16 iştirakçı ölkədən 10 komanda medallara sahib ola bilib.
Xatırladaq ki, 4-6 aprel tarixlərində İstanbulun Qəzənfər Bilgə İdman Kompleksində açıq turnirdə 16 ölkədən 756 idmançı iştirak edib. 1-4 may tarixlərində Finlandiyanın Tampere şəhərində 49-cu Avropa çempionatına hazırlıqların bir hissəsi kimi Türkiyəyə yollanan böyüklərdən ibarət milli komandamız ənənəvi beynəlxalq “Boğaziçi” turnirindən əvvəl isə İstanbulda bir həftəlik beynəlxalq təlim-məşqlərə qatılıb. İdmançılarımız qardaş ölkədə birgə hazırlıqlarda Azərbaycan Milli Karate Federasiyasının prezidenti Yaşar Bəşirovun, baş məşqçi Rəhman Hətəmov, baş məşqçinin köməkçisi Rəşad Hüseynov və kata üzrə böyük məşqçi Vahid Nəzərovun rəhbərliyi ilə iştirak edib. Onlardan başqa bu yeniyetmələrdən ibarət seçmə komandamızın böyük məşqçisi Anar Allahverdiyev və gənclərin böyük məşqçisi Şahin Xudaverdiyev də İstanbuldakı yarışa idmançıları gərgin məşqlərlə hazırlayıblar. Beynəlxalq hakimimiz Nərgiz Mehdiyeva isə "Boğaziçi" turnirini idarə edənlər arasında olub.
İdmançılarımız ayın 8-də Bakıya dönəcəklər.
(AKF mətbuat xidməti)
