4 oktyabr 2011 20:27
Azərbaycan London olimpiadasına 20-ci lisenziyasını qazandı
Xəbər verdiyimiz kimi, Azərbaycan boksçusu Elvin Məmişzadə 2012-ci il London Yay Olimpiya Oyunlarına lisenziya qazanıb. Azerisport.az xəbər verir ki, 52 kq çəki dərəcəsində yarışan təmsilçimiz Bakıda keçirilən dünya çempionatının 1/8 finalında Monqolustan boksçusu Tuqtsoq Nyambayaru üzərində qələbə qazanıb - 17:14.
Bununla da Məmişzadə ən azı ilk “8-lik”dəki yerini təmin edib. Qaydalara əsasən, dünya çempionatında ilk “10-luğ”a düşənlər London olimpiadasına vəsiqəyə sahib olurlar. Bu səbəbdən, Hacəliyev sonrakı döyüşlərinin nəticəsindən asılı olmayaraq, ölkəmizdən boks üzrə üçüncü olimpiya lisenziyasına yiyələnib. Daha öncə Soltan Migitinov (75 kq) WSB (Ümumdünya Boks Seriyası) Liqasındakı uğurlu çıxışı ilə əlaqədar London olimpiadasına lisenziya qazanmışdı. Bu gün isə məhz Bakıdakı DÇ-də Heybətulla Hacıəliyev Məmişzadə kimi 1/4 finala çıxmaqla belə bir uğura imza atmışdı.
Qeyd edək ki, Məmişzadə bütövlükdə Azərbaycanın 2012-ci il London Yay Olimpiya Oyunlarına lisenziya qazanan 20-ci idmançısıdı. Əvvəllər atletikanın çəkicatma növündə Dmitri Marşin, taekvondoçularımız Fəridə Əzizova (67 kq) və Ramin Əzizov (80 kq), boksçumuz Soltan Migitinov (75 kq), güllə atıcımız İradə Aşumova, kanoeçilərimiz Valentin Demyanenko (1 nəfərlik qayıqla 200 metr) və Sergey Bezuqlıy – Maksim Prokopenko dueti (2 nəfərlik qayıqla 1000 metr), akademik avarçəkənlərimiz Aleksandr Aleksandrov və Nataliya Mustafayeva (hər 2-si 1 nəfərlik qayıqla 2000 metr), yunan-Roma güləşçilərimiz Rövşən Bayramov (55 kq) və Saman Ahman Tahmasebi (84 kq), qadın güləşçimiz Mariya Stadnik (48 kq), sərbəst güləşçilərimiz Cəbrayıl Həsənov (66 kq), Əşrəf Əliyev (74 kq), Şərif Şərifov (84 kq) və Camaləddin Maqomedov (120 kq), velosipedçimiz Yelena Çalıx və bədii gimnastımız Aliyə Qarayeva da bu hüquqa sahib olub.
