19 aprel 2012 01:14
Azərbaycan London olimpiadasına daha bir lisenziya qazandı
Azərbaycan boksçusu Məhəmməd Əbdülhəmidov 2012-ci il London Yay Olimpiya Oyunlarına lisenziya qazanıb. Azerisport.az xəbər verir ki, 56 kq çəki dərəcəsində yer alan təmsilçimiz bu uğura Türkiyənin Trabzon şəhərində keçirilən Avropa olimpiya təsnifat turnirində nail olub.
Londona vəsiqə üçün Əbdülhəmidova cəmi 2 döyüşü qələbə ilə başa vurmaq kifayət edib. Boksçumuz mübarizəyə 1/8 finaldan qoşulub. Əvvəlcə macarıstanlı Kristian Nagini 13:9 hesabı ilə üstələyən yığmamızın üzvü növbəti mərhələdə Almaniyanı təmsil edən Denis Makarova qalib gəlib – 13:4. Makarovla qarşılaşmada Əbdülhəmidov ilk raunddan təşəbbüsə yiyələnib. O, ilk raundu 4:2, ikincini 4:1, sonuncunu isə 5:1 hesablı üstünlüklə tamamlayıb. Reqlamentə əsasən, 56 kq çəki dərəcəsində 4 boksçu London olimpiadasına lisenziya qazanır. Bu isə o deməkdir ki, Əbdülhəmidov yarımfinalda gürcüstanlı Merab Turkadze ilə keçirəcəyi döyüşün nəticəsindən asılı olmayaraq, qarşıya qoyulan vəzifənin öhdəsindən gəlib. Bununla da XXX Yay Olimpiya Oyunlarına vəsiqə qazanan boksçularımızın sayı 6-ya çatıb. Daha öncə Elvin Məmişzadə (52 kq), Heybətulla Hacəliyev (64 kq), Soltan Migitinov (75 kq), Teymur Məmmədov (91 kq) və Məhəmmədrəsul Məcidov (+91 kq) olimpiadaya lisenziya əldə edib. Ümumilikdə isə bu, Londona 32-ci lisenziyadır.
Qeyd edək ki, Trabzon rinqinə ümumilikdə 5 boksçumuz çıxıb. Hazırda Məhəmməd Əbdülhəmidovdan əlavə, Vətən Hüseynli (81 kq) də mübarizəni davam etdirir. Hüseynli ¼ finalda Fransa təmsilçisi Abdulkader Buhenyanı yenib – 16:8. Boksçumuz birinci və üçüncü raundları 5:2, ikincini isə 6:4 hesablı üstünlüklə tamamlayıb. O, yarımfinalda ingiltərəli Kellam Smitlə qarşılaşacaq. 81 kq çəki dərəcəsində 3 boksçu London olimpiadasına lisenziya qazanacaq. Həmyerlimiz yarımfinalda uduzacağı halda, rəqibinin turnirin qalibi olmasını arzulamalıdır. Əvəzində Salman Əlizadə (49 kq) və Elvin İsayevin (60 kq) ardından Tamerlan Abdullayev (69 kq) də mübarizəni dayandırıb. Abdullayev ¼ finalda irlandiyalı Adam Nolana uduzub – 13:17. İlk raundda Nolan 6:3, ikincidə Abdullayev 8:6 hesabı ilə üstün olub. Üçüncü raundda isə irlandiyalı boksçu yenə 3 top fərqi ilə qalib gəlib – 5:2.
