AR-nın idman naziri Madridin Real klubunun stadionunda
29 noyabr 2010 19:40
Azərbaycan Respublikası gənclər və idman naziri Azad Rəhimov İspaniya Ali İdman Şurasının sədri Xayme Lissavetzkinin dəvəti ilə İspaniyada səfərdə olmuşdur. Azerisport.az xəbər verir ki, Avropa Dünya Antidopinq Agentliyinin İcraiyyə Komitəsində keçən göruş zamanı hər iki ölkə arasında idman sahəsində əlaqələrin mövcud vəziyyəti və inkişaf perspektivləri, gələcək əməkdaşlıq yolları barəsində müzakirələr aparılmışdır.
Azərbaycan Respublikası Gənclər və İdman Nazirliyi və İspaniya Krallığının Ali İdman Şurası arasında idman sahəsində əməkdaşlığa dair imzalanmış Memorandumda idman qurğularının layihələşdirilməsi və inşası sahəsində əldə olunmuş təcrübəyə dair məlumatların mübadiləsinin təmin edilməsi, idmana aid elm və texnologiya sahəsində təcrübə mübadiləsinin aparılması, əlillər üçün idmanın dəstəklənməsi və təşviq olunması üzrə birgə proqramların işlənib hazırlanması, uşaq idmanının inkişafı, dopinqə qarşı mübarizə sahəsində əməkdaşlıq və s. mövzular öz əksini tapmışdır.
Səfər çərçivəsində Azad Rəhimov Madrid Elit İdmançıların hazırlığı Mərkəzinə, Dövlət Antidopinq Mərkəzinin Dopinq Nəzarəti Laboratoriyasında olmuş və həmin mərkəzlərin işi barədə geniş məlumat əldə etmişdir. Nümayəndə heyəti üçün Madridin Real klubunun stadionuna tanışlıq səfəri təşkil edilmişdir.
Xüsusi ilə qeyd etmək lazımdır ki, bu Azərbaycan Hökuməti nümayəndəsinin İspaniya Krallığına ilk rəsmi səfəridir. Bununla yanaşı Azad Rəhimov və Xayme Lissavetzki arasında idman sahəsində əməkdaşlığa dair imzalanmış Memorandum iki ölkə arasında ilk rəsmi sənəddir.
