Bakı-2020 üçün 494 min imza
11 aprel 2012 15:58
Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevanın rəhbərlik etdiyi nümayəndə heyəti aprelin 14-də Moskvada keçiriləcək Milli Olimpiya Komitələrinin Baş Assambleyasında iştirak edəcək. Azerisport.az xəbər verir ki, bu sözləri aprelin 11-də keçirilən brifinqdə “Bakı-2020” Təşkilat Komitəsinin icraçı direktoru Könül Nurullayeva deyib.
O, bildirib ki, Azərbaycanın birinci xanımı, Gimnastika Federasiyasının prezidenti Mehriban Əliyeva Rusiyanın paytaxtında min nəfər nümayəndə heyətinin iştirak edəcəyi Assambleyada Bakının 2020-ci il Yay Olimpiya və Paralimpiya Oyunlarına namizədliyinə dair təqdimatla çıxış edəcək. Ölkəmizin Moskvada yüksək səviyyəli nümayəndə heyəti ilə təmsil olunmasını əlamətdar hadisə kimi qiymətləndirən K.Nurullayeva Assambleyada Azərbaycanın birinci xanımı Mehriban Əliyevanın Bakının 2020-ci il Yay Olimpiya və Paralimpiya Oyunlarına dair təqdimat etməsinin böyük şərəf olduğunu diqqətə çatdırıb.
Nurullayeva vurğulayıb ki, 2020-ci il Yay Olimpiya və Paralimpiya Oyunlarına namizədliyimizin irəli sürülməsində məqsədimiz bu mötəbər tədbir vasitəsilə ölkəmizdə idmanın inkişafını daha da sürətləndirmək, sağlam həyat tərzini təbliğ etmək, gələcək nəsillər üçün möhtəşəm idman infrastrukturunu miras qoymaq və dünyaya nümunəvi Olimpiya Oyunları keçirməyə qadir olduğumuzu göstərməkdi. Bakının bu prosesdə üstünlüklərini diqqətə çatdıran K.Nurullayeva, paytaxtımızın iqliminin beynəlxalq idman yarışları üçün əlverişli olduğunu deyib. Bildirib ki, Bakı və bütövlükdə ölkəmiz zəngin mədəniyyət, gözəl təbiət və qədim tarixə malikdi. Əksər dünya ölkələrinin iqtisadi böhran vəziyyəti yaşadığı dövrdə ən sürətli iqtisadi göstəricilərə malik Azərbaycanın paytaxtı Bakının namizədliyinin irəli sürülməsi məntiqlidi.
“TNS Global”ın keçirdiyi rəy sorğusuna görə, Azərbaycan əhalisinin 95 faizinin Bakının 2020-ci il Olimpiya və Paralimpiya Oyunlarına ev sahibliyi üçün namizədliyini dəstəklədiyini diqqətə çatdıran natiq Azərbaycan Tələbə Gənclər Təşkilatları İttifaqı (ATGTİ) tərəfindən imzatoplama kampaniyasının uğurla davam etdiyini diqqətə çatdırıb. Nəzərə çatdırılıb ki, hazırda ATGTİ tərəfindən 494 min imza toplanıb. Bunun 111 mini paytaxt, qalanı bölgələrin payına düşür.
K.Nurullayeva vurğulayıb ki, Olimpiya və Paralimpiya Oyunları Bakıda keçirilərsə, bu, Azərbaycanın inkişafına təkan verəcək, həm də Beynəlxalq Olimpiya Hərəkatının genişlənməsinə səbəb olacaq. Bizim namizədliyimizin şüarı olan “Birlikdə bacarırıq” ifadəsi Azərbaycanın beynəlxalq Olimpiya ictimaiyyəti və bütövlükdə dünya ölkələri ilə dostluq və əməkdaşlığın inkişafına olan istəyini nümayiş etdirir. “Bakı-2020” Sifariş Kitabında təqdim etdiyimiz Olimpiya infrastrukturu isə ölkəmizin və regionun gələcək idman ehtiyaclarını tam ödəyəcək.
ATGTİ-nin sədri Şahin İsmayılov imzatoplama kampaniyasının uğurla davam etdiyini və vətəndaşlarımızın bu aksiyada yüksək fəallıq göstərdiyini diqqətə çatdırıb.
Qeyd edək ki, Azərbaycanın birinci xanımı Mehriban Əliyevanın rəhbərlik edəcəyi nümayəndə heyətinin tərkibinə Baş nazirin birinci müavini Yaqub Eyyubov, gənclər və idman naziri Azad Rəhimov, Milli Olimpiya Komitəsinin vitse-prezidenti Çingiz Hüseynzadə, “Bakı-2020” Təşkilat Komitəsinin icraçı direktoru Könül Nurullayeva, Azərbaycan Futbol Federasiyaları Assosiasiyasının (AFFA) baş katibi Elxan Məmmədov və “Bakı-2020”-nin kommunikasiya direktoru Nərgiz Birk-Petersen daxildirlər.
