BMT-də ölkə rəhbərliyi ilə MOK-lar arasında hüquq və vəzifələrin müəyyənləşdirilməsi haqqında razılıq təklifi edilib
17 aprel 2012 20:00
Bu gün Moskvada Milli Olimpiya Komitələri Assosiasiyalarının (MOKA) XVlll Baş Assambleyası öz işini başa vurub. Azerisport.az xəbər verir ki, assambleyanın işində dünyanın 200-dən çox ölkəsinin Milli Olimpiya Komitəsinin (MOK) rəhbərləri və təmsilçiləri, həmçinin başda təşkilatın prezidenti Jak Roqqe olmaqla Beynəlxalq Olimpiya Komitəsinin (BOK) üzvləri iştirak ediblər.
Assambleyanın və forumun yekunlarından biri şeyx Əl-Sabahın MOKA və BMT arasında qapalı razılaşma imzalanması ilə bağlı təklifi olub. Təklifdə ölkə rəhbərliyi ilə MOK-lar arasında idmanda hüquq və vəzifələrin müəyyənləşdirilməsi, tərəflərin öz məsuliyyətini və idmanın inkişafında yerini bilməsi ilə bağlı müddəa əksini tapıb. Bu barədə RİAN-a Rusiya Olimpiya Komitəsinin prezidenti Aleksandr Jukov bildirib.
Xatırladaq ki, MOKA-nın Baş Assambleyası çərçivəsində təşkilatın yeni prezidenti şeyx Əhməd Əl-Fəhad Əl-Sabah seçilib. 2020-vi il yay Olimpiya oyunlarının keçirilməsinə namizəd şəhərlər (həmçinin Bakı) öz ərizələrini təqdim ediblər.
