Əfqan Bayramovdan fiasko , Sərdar Həsənov səkkizinci oldu (YENİLƏNİB)
1 avqust 2012 00:55
Bu gün Azərbaycanın ağırlıqqaldırma üzrə yığmasının daha iki üzvü London olimpiadasında qüvvəsini sınayıb. Azerisport.az xəbər verir ki, bunlar 69 kq çəki dərəcəsində mübarizə aparacaq Sərdar Həsənov və Əfqan Bayramov idi.
Qeyd edək ki, Sərdar Həsənov B qrupunda yarışıb. Hansı ki, bu qrupda mübarizə daha tez başlayıb. Sərdar birdənqaldırma yarışlarında ilk cəhdi üçün öncə 135, son anda 138 kq sifariş edib. Atletimiz ilk cəhdində bu ağırlığı qaldırmağı bacarıb. İkinci cəhdində Sərdar 145 kq sifariş verib və bunun da öhdəsindən gəlib. Son olaraq 150 kq sifariş verən təmsilçimiz bu cəhdində uğursuzluqla üzləşir. Birdənqaldırmada yekun nəticədə Sərdardan daha yaxşı nəticəni ekvadorlu idmançı göstərir - 148 kq. 145 kq çəkini isə Həsənovla yanaşı KXDR və Türkmənistan idmançıları da qaldırıb.
Təkanlaqaldırmada ilkin sifariş 167 kq idi. Həsənov ilk cəhdində uğurlu olub. O, ikinci cəhdində 176 kq çəkinin də öhdəsindən gəlib. Amma son cəhdində 181 kq sifariş edən atletimiz uğursuz çıxışla yadda qalıb. İki hərəkətin cəminə görə yekun nəticə - 321 kq. Venesuela (328 kq) və KXDR (329 kq) atletləri Sərdardan daha güclü çıxıblar. Lakin bu çəki dərəcəsində qaliblərin kimliyi digər yarımqrupdakı görüşlər başa çatandan sonra bilinib.
Əfqan Bayramov isə A qrupunda yarışıb. O, birdənqaldırma yarışlarında podiuma ilk olaraq 142 kq üçün çıxıb və bunun öhdəsindən gələ bilməyib. Çox təəssüf ki, növbəti iki cəhdi də boşa çıxan atletimiz bu üzdən birbaşa təkanlaqaldırma yarışlarından da kənar qalıb və mübarizəni dayandırmalı olub.
Hər iki yarımqrupda yarışlar bitdikdən sonra yekun nəticə məlum olub. Beləliklə, Əfqan Bayramov bu çəki dərəcəsində yer tuta bilməyib. Öz yarımqrupunda üçüncü olmuş Sərdar Həsənov isə sonda səkkizinci olub.
Maraq üçün bildirək ki, ağırlıqqaldırma yığmamızın üzvlərindən artıq ikisi London Olimpiadasında qüvvəsini sınayıb. Valentin Xristov (56 kq) bürünc medal qazanaraq, yığmamızın ilk uğuruna imza atıb. Boyanka Kostova (58 kq) isə turniri 5-ci pillədə başa vurub.
