Ağacan Əbiyev London Olimpiadasından kənarlaşdırıldı
3 avqust 2012 00:54
London Yay Olimpiadası çərçivəsində təşkil olunan boks yarışlarının 1/8 final mərhələsində yaponiyalı Şatori Şimizu və azərbaycanlı Məhəmməd Əbdülhəmidov arasında keçirilən görüşün baş hakimi evə göndərilib. Azerisport.az xəbər verir ki, türkmənistanlı referi İşanquli Meretniyazov ədalətli hakimlik etməməkdə ittiam olunur.
Qeyd edək ki, Şimizu ilə Əbdülhəmidov arasındakı görüş böyük qalmaqala səbəb oldu. 56 kq-da mübarizə aparan boksçuların duelində ilk raundu boksçumuz öndə tamamlamışdı - 4:2. Elə ikinci raundda da Əbdülhəmidov qalib gəldi - 8:3. Son raundda isə hər şey tərsinə cərəyan edib. Belə ki, boksçumuz ilk raundlardan fərqli çox zəif döyüş nümayiş etdirməsi azmış kimi, tez-tez yerə yıxılmağa başladı. Ayaq üstə dura bilməyən Məhəmməd bununla rəqibinə də çoxlu zərbə vurmaq imkanı yaratdı. Hakimin də məhz bu zamankı idarəçiliyi və qərarları ona baha başa gəlib. Qeyd edək ki, referi Əbdülhəmidovun hər dəfə ayağa qalxıb görüşü davam etdirməsinə imkan yaratmışdı. Nəticədə, rəqibin son raunddakı 12:10 hesablı qələbəsi Əbdülhəmidovun 22:17 hesabı ilə qalib gəlməsinə mane olmamışdı.
Lakin sonradan yaponların bu nəticədən və hakimlikdən şikayəti Əbdülhəmidova texniki məğlubiyyətlə nəticələndi. Bu azmış kimi, görüşün hakimi də cəzasız qalmadı.
Azərbaycanın bu qalmaqallı görüşlə əlaqədar itkisi təkcə Əbdülhəmidovun diskvalifikasiya olunması ilə bağlı deyil. Belə ki, Azərbaycan Boks Federasiyasının vitse-prezidenti Ağacan Əbiyev də yarışlardan kənarlaşdırılıb. Onun davranış qaydalarını pozduğu iddia olunur.
