London Olimpiadasında daha bir təmsilçimiz çıxışını başa vurdu (YENİLƏNİB)
3 avqust 2012 18:46
Bu gün Azərbaycanın yüngül atletika yığmasının üzvü Dmitri Marşin London Yay Olimpiadasında mübarizəyə başlayıb. Azerisport.az xəbər verir ki, o, yüngül atletikanın çəkicatma idman növü üzrə yarışlarda qüvvəsini sınayıb.
Marşin mübarizəyə təsnifat mərhələsindən başlayıb. Həmyerlimiz 21 atletin yer aldığı B qrupunda mübarizə aparırdı. Final mərhələsinə vəsiqə qazanmaq üçün öncə təsnifat mərhələsində qaliblər sırasında yer almaq lazım idi.
İdmançımızın ilk cəhdi 72.06 metr məsafə olur. İkinci cəhdində isə atışı düzgün yerinə yetirmədiyi üçün, nəticəsi qeydə alınmır. Lakin sonuncu atışında o, ilk nəticəsini cüzi də olsa, yaxşılaşdıra bilir - 72.85.
Bu nəticə idmançımızın final mərhələsinə düşməsi üçün yetərli deyil. Çünki ondan daha yaxşı göstəriciyə imza atan çəkicatanlar var. Beləliklə, Marşin də Olimpiada ilə erkən vidalaşan idmançılarımızın sırasına qoşulur.
