İbrahimov da Olimpiadanı medalsız başa vurdu (YENİLƏNİB)
11 avqust 2012 23:50
Bu gün London Yay Olimpiya oyunlarının finalına vəsiqə qazanan daha bir təmsilçimiz qalib adı uğrunda mübarizə aparıb. Azerisport.az xəbər verir ki, bu, 5000 metr məsafəyə qaçış üzrə yarışlarda qüvvəsini sınayan atletimiz Hayle İbrahimov idi.
Qeyd edək ki, İbrahimov yarımfinal mərhələsində öz qrupunu lider kimi başa vurmaqla finala vəsiqə qazanmışdı. Belə ki, o, 5000 metr məsafəni 13:25.23 nəticə ilə birinci qət etmişdi. Amma Olimpiadanın qalibi olmaq üçün təmsilçimiz final yürüşündə bu göstəricisini daha da yaxşılaşdırmağa borcluydu.
Azərbaycan atleti finalda 14 idmançı ilə yarışıb. İbrahimovun həlledici mərhələdəki rəqiblərinə gəlincə, bunlar İsayya Koç, Tomas Lonqosiva (hər ikisi Keniya), Məhəmməd Fərəh (Böyük Britaniya), Lopes Lomonq, Bernard Laqat, Geylen Rapp (hamısı ABŞ), Haqos Gebrhivet, Dejen Gebremeskel, Yenev Alamirev (hamısı Efiopiya), Abdallaati İgider (Mərakeş), Mozes Kipsiro (Uqanda), Kemeron Levins (Kanada), Xuan Luis Barrios (Meksika) və Mumin Qala (Cibuti) idi. Amma təəssüf ki, o, bu idmançılar arasında yalnız 9-cu yeri tutub. İbrahimov məsafəni 13 dəqiqə 45 saniyəyə (13:45.37) qət edib.
