Ramin Əzizov həm çempion oldu, həm də olimpiadaya vəsiqə qazandı (YENİLƏNİB)
2 iyul 2011 20:15
Bakıda taekvondo üzrə 2012-ci ildə Londonda keçiriləcək Yay Olimpiya Oyunlarına lisenziya verən beynəlxalq turnir davam edir. Azerisport.az xəbər verir ki, "Sərhədçi" Olimpiya Mərkəzində keçirilən turnirin üçüncü günündə Azərbaycan yığmasının üzvlərindən Ramin Əzizov (80 kq) olimpiadaya vəsiqə uğrunda mübarizə aparmaq hüququ qazanıb.
Əzizov yarışa ikinci mərhələdən qoşulub. Onun rəqibi isə Lai Li (Çin) olub. Görüşün əsas vaxtı 7:7 bitsə də, Ramin əlavə vaxtda rəqini məğlub etməyi bacarıb. Növbəti mərhələdə avstriyalı Asan Burak da təmsilçimizə müqavimət göstərə bilməyib. Görüş çətin keçsə də, sonda Ramin 10:8 hesabıyla qalib gəlib. 1/4 finalda isə rəqib mərakeşli İssam Çernubi idi. Əzizov onu da çətinliklə də olsa, keçməyi bacarıb - 9:8.
Yarımfinaldakı rəqib italiyalı Mauro Sarmiente idi. Bu rəqibinə qalib gələcəyi halda Əzizov olimpiadaya vəsiqəni rəsmiləşdirmiş olacaqdı. O, bu döyüşdə də 8:3 hesabıyla qələbə qazanaraq, Azərbaycana London olimpiadasına üçüncü lisenziyanı qazandırıb.
Finalda Ramini iranlı Yusif Kərimi ilə duel gözləyirdi. Əzizov bu rəqibini də məğlub edərək, böyük uğura imza atıb.
Qeyd edək ki, bu yarışda hələlik millimizin üzvlərindən sadəcə Fəridə Əzizova (67 kq) finalda uduzsa da, olimpiadaya lisenziya qazana bilmişdi. Bütövlükdə isə, ilk lisenziya çəkic atma idman növündə Dmitri Marşaldan gəlmişdi.
