Bakıda keçiriləcək Formula 1 ilə əlaqədar bağlanacaq yolların siyahısı açıqlandı
23 oktyabr 2012 13:39
Bakıda keçiriləcək GT-3 kateqoriyalı "Formula 1" şou-proqramı - avtomobil yarışının hərəkət marşrutu üzrə kəsişən küçə və yollarda avtomobillərin hərəkəti məhdudlaşdırılacaq. Bakı Şəhər Dövlət Yol Polisi İdarəsinin bölmə rəisi Vaqif Əsədov bildirib ki, oktyabrın 24-də tədbirin hazırlığı, sonrakı günlərdə rəsmi paradla açılışı ərazidə məşqlərin, kvalifikasiya işlərinin aparılması, avtomobillərin start və finişi oktyabrın 28-dək davam edəcək.
Azerisport.az xəbər verir ki, 10 ölkə komandası və dünyanın ən məşhur avtomobil brendlərindən olan Lamborghini, Maserati, Ferrari, Mercedes, Porsche və s. markalı 35 avtomobil 14 döngə və 2200 metrlik yürüş zolağı boyunca hərəkət edəcək. Yarışın dünyanın 32 ölkəsində 65 televiziya kanalı vasitəsi ilə birbaşa yayımlanması nəzərdə tutulub.
Bu məqsədlə tədbirin təhlükəsizliyinin tam təmin edilməsi üçün İdarə əhalinin və avtomoil sürücülərinin nəzərinə çatdırır ki, 24 oktyabr saat 07:30-dan oktyabrın 29-na kimi - tədbir tam başa çatana qədər paytaxtın yürüş zolağı kimi nəzərdə tutulmuş Azadlıq meydanı, Zorgi, Puşkin, Ü.Hacıbəyov, Z.Əliyeva, R.Behbudov küçələri, Azadlıq, Neftçilər prospektləri istiqamətində avtomobillərin hərəkətinə məhdudiyyət qoyularaq istiqamət dəyişdiriləcək.
Ona görə də İdarə sürücülərdən qeyd edilən müddət ərzində A.Cəlilov və Y.Səfərov küçələrinin kəsişməsindən, S.Vurğun küçəsi və Bülbül prospekti ilə Z.Əliyeva küçəsinin kəsişməsindən, Niyazi küçəsi ilə Azneft dairəsinə və Azneft dairəsi ilə Neftçilər prospektinə, həmçinin Kempinski hotelindən M.Müşfiq küçəsi ilə Parlament prospekti, M.Hüseyn, T.Elçin, Niyazi küçələrindən Azneft dairəsinə Neftçilər prospekti ilə yürüş zolağı istiqamətində hərəkətin məhdudlaşdırılmasını nəzərə alaraq mümkün qədər şəxsi avtomobillərdən az istifadə edilməsini, alternativ yollardan, ictimai nəqliyyatdan istifadəni tövsiyyə edir. (Trend)
