Azərbaycan idmançıları dünya yığmasını darmadağın etdilər
23 sentyabr 2013 12:15
Sentyabrın 22-də Bakıdakı "Sərhədçi" Olimpiya İdman Mərkəzində ümummilli lider Heydər Əliyevin anadan olmasının 90 illiyinə həsr olunmuş kikboksinq üzrə beynəlxalq turnir keçirilib. Azerisport.az xəbər verir ki, açılış mərasimində çıxış edən Azərbaycan Kikboksinq Federasiyasının prezidenti Adil Əliyev, Ağsaqqallar Şurasının sədri Fəttah Heydərov və Milli Məclisin deputatı Eldar İbrahimov ölkəmizdə idmana göstərilən dövlət qayğısından danışıb, Azərbaycan idmançılarının beynəlxalq yarışlarda qazandığı nailiyyətləri yüksək qiymətləndirib, respublikamızın artıq bir idman dövlətini çevrildiyini vurğulayıblar.
Rəsmi hissə başa çatdıqdan sonra Türkiyədən dəvət olunmuş məşhur müğənnilər konsert proqramı ilə çıxış ediblər. Yarışı Heydər Əliyev Fondunun vitse-prezidenti Leyla xanım Əliyeva da izləyib.
Gərgin idman mübarizəsi şəraitində keçən turnirdə Azərbaycan idmançıları Eduard Məmmədov (63 kq) Yaqub Bersanukayevə (Rusiya), Elnur Dəryagir (63 kq) Semir Deliçə (Bosniya və Herseqovina), Turan Qafarov (67 kq) Aleks Vayta (ABŞ), Araz Pirməmmədov (71 kq) Fabiano Antonio da Silvaya (Braziliya), Ramal Aslanov (71 kq) Vitali Farxutdinova (Ukrayna), Pərviz Abdullayev (73 kq) Konstantin Pasniçusa (Rumıniya), Anar Məmmədov (91 kq) Mesud selimoviçə (Bosniya və Herseqovina), Ağalar Sadıxzadə (91 kq) Timur Bekturganova (Qazaxıstan) və Zamiq Atakişiyev (91 kq) isə Qalimjan Utegenova (Qazaxıstan) qalib gəliblər.
Günün ən maraqla gözlənilən görüşü 91 kiloqramdan yuxarı çəki dərəcəsində milli komandamızın üzvü Zabit Səmədov və serbiyalı Droqan Yavanoviç arasında keçirilib. Hər üç raundda rəqibindən üstün olan Z.Səmədov görüşünü qələbə ilə başa çatdırıb.
Milli komandamızın üzvlərindən T.Qafarov, R.Aslanov və A.Sadıxzadə görüşlərini nokautla başa vurublar.
Kikboksinqçilərimizdən yalnız 84 kiloqram çəki dərəcəsində mübarizə aparmış Xəyal Əhmədov hollandiyalı idmançı Niels Vilminkə məğlub olub.
Qaliblərə kubok və xatirə hədiyyələri təqdim olunub.
