Çaparımız Beynəlxalq turnirdə 3 dəfə bayrağımızı yüksəltdi
Danimarkada atçılığın Konkur növü üzrə CSİ-1* və CSİ-2* kateqoriyalı beynəlxalq yarışlar keçirilib. Azerisport.az xəbər verir ki, turnirdə Azərbaycanı “Kornus VA” , “Carvin” və “Sir Poldi-3” ləqəbli atlarla milli komandamızın üzvü Andre Şröder təmsil edib.
Əvvəlcə çaparımız “Kornus VA” ləqəbli atla maneələri 115 sm-lik yarışlarda qüvvəsini sınayıb. Yerli idmançıların fəallıq göstərdiyi turnirdə Andre Şröder bütün rəqiblərini qabaqlayaraq birinci olub. Turnirdə ikinci və üçüncü yerləri Danimarkalı idmançılar, müvafiq olaraq “Fortuna” ləqəbli atla Emili Luise Velsbi və “Azalea” ləqəbli atla Michael Ertman Henriksen tutublar. Ardınca çaparımız hündürlüyü 135 sm olan maneələri dəf etmə yarışlarında da qüvvəsini sınayıb. Bu dəfə Şröder “Sir Poldi-3” ləqəbli atla mübarizə aparıb. İdmançımız yenə fəxri kürsün ən yüksək pilləsinə qalxıb. Yarışda ikinci yeri “Jonni B” ləqəbli atla İsveçli Jorgen Larson tutub. “Herzblatt 25” ləqəbli atla Almaniyalı Casandra Orschel isə 3-cü olub. Nəhayət günün üçüncü yarışı 140 sm-lik maneələrə qarşı olub. Həlledici yarışa “Sir Poldi -3” ləqəbi atla qatılan Andre Şröder bu dəfə də bütün rəqiblərini qabaqlayaraq qələbəni bayram edib. 140-sm-lik maneələrə qarşı yarışlarda ikinci pilləni, “Caltona” ləqəbli atla Yeni Zellandiyalı Bruce Goodin, üçüncü pilləni isə “Acantya” ləqəbli atla Almaniyalı Casandra Orschel tutub.
Qeyd edək ki, yarışlar 3 avqust tarixinədək davam edəcək.
