Beynəlxalq festivalın iştrakçıları Bakıya gəlirlər (FOTOLAR)
15 may 2013 14:54
Mayın 19-da keçiriləcək “Əlil arabasında idman rəqsi üzrə Beynəlxalq festival”a dəvət olunmuş qonaqlar Azərbaycana gəlirlər. Azerisport.az xəbər verir ki, İsrail və Qazaxstanın ardınca mayın 15-də gecə saatlarında Ukrayna nümayəndə heyəti ölkəmizə gəliblər.
Heydər Əliyev Beynəlxalq Hava limanında qonaqları Milli Paralimpiya Komitəsinin əməkdaşları və KİV nümayəndələri qarşılayıblar. Ukrayna idmançılarına rəhbərlik edən Yuliya Kozlyuk Azərbaycanda idmana göstərilən dövlət qayğısını yüksək qiymətləndirib: “Azərbaycan artıq idman ölkəsinə çevrilib. Bu ölkədə dünyanın ən nüfüzlu və mötəbər yarışları keçirilir. Əlil arabasında idman rəqsi üzrə Beynəlxalq festivalının Bakıda keçirilməsini yüksək qiymətləndirirəm”.
Yuliya Kozlyuk Azərbaycan ilə Ukrayna arasındakı əlaqələrin yüksək səviyyədə olduğunu vurğulayıb. Qonaq, təşkilatçılara, Milli Paralimpiya Komitəsinə və Gənclər İdman nazirliyinə təşəkkürünü bildirib. O qeyd edib ki, Bakıya ilk dəfədi gəlir: “Gəlməmişdən əvvəl şəhəriniz haqqında məlumat toplamışam. İnternetdə görüb əmin oldum ki, Bakı həqiqətən gözəl şəhərdi. Eşitdiyimə görə, azərbaycanlılar çox qonaqpərvərdirlər və buna ilk gündən əmin olmağa başladım”.
Əlil arabasında idman rəqsi üzrə üçqat Ukrayna çempionu, dünya kuboku yarışlarının qalibi İvan Zamiqa Azərbaycan paralimpiyaçılarının qazandığı nailiyyətlərin əhəmiyyətindən danışıb və idmanın bu növünün Paralimpiya Oyunlarının proqramına salınmasının vacibliyini vurğulayıb. Ölkəmizə ilk dəfə səfər etdiyini bildirən idmançı Azərbaycanın mötəbər yarışlara və tədbirlərə yüksək səviyyədə ev sahibliyi etməsindən xəbərdar olduğunu diqqətə çatdırıb.
Qeyd edək ki, Milli Paralimpiya Komitəsinin Gənclər və İdman Nazirliyi ilə birgə təşkil etdiyi festival mayın 19-da Dənizkənarı Milli Parkda keçiriləcək. (Milli Paralimpiya Komitəsi Mətbuat Xidməti)
