Elvin Məmişzadə: Əsas məqsədim adımı idman tariximizə yazmaqdır
Boks üzrə dünya çempionu (52 kq) Elvin Məmişzadə azerisport.az saytına müsahibəsində ABŞ toplanışından, Rio Olimpiadasındakı hədəflərindən danışıb.
- Bir müddət öncə Amerikada toplanış keçdiniz. Şəxsən bu hazırlıq prosesi sənə nə qazandırdı?
- Məşqlərimiz yaxşı gedir. Kolorado-Sprinqs şəhərində çox faydalı toplanış keçdik. Ordakı bazada hər cür şərait var. Üstəlik, dəniz səviyyəsindən yüksəklikdə yerləşdiyindən orda hazırlıq keçmək bizim üçün çox xeyirli oldu. Sınaqçı-rəqibim amerikalı boksçu idi. Yaxşı idmançı idi.
- Hazırda formadasan?
- Hələ pik nöqtəyə çatmamışam. İndi formada olmaq mənə sərf eləmir. Yarışa 1 həftə qalmış ən yüksək səviyyəyə çatmaq lazımdır.
- Məşqlərdə yüklənmə prosesi davam edəcək?
- Əlbəttə. İndi 3 boksçumuzu lisenziya turniri gözləyir. Bakıdakı yarışdan sonra yenə ABŞ-da toplanış keçəcəyik. Yüklənmə orda olacaq. Sonra yenidən vətənə qayıdıb, məşqləri burda davam etdirəcəyik. Daha sonra Olimpiada ərəfəsində Braziliyada toplanış keçəcəyik ki, bu da mühitə, iqlimə, saat fərqinə uyğunlaşmağa imkan verəcək. Olimpiya Oyunları ərəfəsində Atletlər kəndinə gedəcəyik.
- Dünya çempionatından sonra səni yarışlarda görməmişik. Olimpiadada döyüş praktikasının azlığından əziyyət çəkəcəyini düşünmürsən?
- Ötən ay İspaniyada beynəlxalq turnirdə çıxış etdim. Həmin yarışda çempion oldum. Praktikamın az olduğunu düşünmürəm.
- Rio-2016-ya dünya çempionu statusuyla qatılacaqsan. Bu üzdən rəqiblərin sənə çox ciddi yanaşacaq. Bu, sənə problem yarada bilər?
- Bütün boksçuların mənə qarşı ciddi hazırlaşacağını bilirəm. Amma eyni zamanda mən də bütün rəqiblərimə qarşı ciddi tədbirlər görəcəyəm. Qətiyyən arxayınlaşmaq olmaz. Dünya çempionluğumdan 8-9 ay vaxt keçib. Bu titula sahibsənsə, rahat olimpiya çempionu olacaqsan deyə bir anlayış yoxdur.
- Rəqiblərinin əksəriyyəti bəllidir. Onların analizinə başlamısan?
- Hələ ki yox. Analizlər son təlim-məşq toplanışlarında olacaq. Bütün rəqiblər müəyyənləşdikdən sonra buna uyğun hazırlıq prosesi keçəcəyik.
- İlk baxışdan belə görünür ki, əsas rəqiblərin Yosvani Veyta (Kuba), Məhəmməd Flissi (Əlcəzair) və Mişa Aloyan (Rusiya) olacaq...
- Razıyam, onlar çox güclü boksçulardır. Ancaq mən yalnız onları fərqləndirmək istəməzdim. Mən hər rəqibə ciddi yanaşacağam. Boksçuları reytinqə və titula görə fərqləndirmək istəmirəm. Olimpiada yeganə yarışdı ki, sürpriz nəticələrlə zəngin olur.
- AİBA peşəkar boksçuların Olimpiadada iştirakına icazə verib. Bu, sənin üçün problem yarada bilər?
- Məncə heç bir peşəkar boksçu Olimpiya Oyunlarında iştirak etməyəcək. Peşəkar boksla, olimpiya boksu fərqlənir. İndiyə kimi peşəkar boksçu ilə döyüşməmişəm. Bu səbəbdən belə görüş olsa, qalib gəlib-gəlməyəcəyimi proqnozlaşdıra bilmərəm.
- Rüfət Hüseynov (49 kq), Kamran Şahsuvarlı (75 kq) və Teymur Məmmədov (81 kq) Bakıda keçiriləcək lisenziya turnirində çıxış edəcək. Onlardan hansının şanslarını yüksək dəyərləndirirsən?
- Mən hamısına inanıram. Düzdür, ən yüngül çəkidə yalnız finalçılar Olimpiadaya vəsiqə qazanacaq. Ancaq Rüfət zəif boksçu deyil. Hüseynov gənc olsa da, böyüklər arasında Avropa üçüncüsü olub. Ondan da uğurlu nəticə gözləyirik.
- Dünya çempionu olsan da, Boks Federasiyası hələ qızıl medal üçün nəzərdə tutulan pul mükafatını sənə verməyib. Bu, səni həvəsdən salmır?
- Yox, ruh düşkünlüyündən söhbət gedə bilməz. Pulumuz ordadı, alacağıq da (gülür).
- Ölkədə yaranmış maliyyə problemlərinə görə olimpiya medalçıları üçün nəzərdə tutulmuş mükafat fondu azalsa, bu, motivasiyana necə təsir edəcək?
- Olimpiadada pula görə döyüşmürük ki. Braziliyaya tarix yazmaq üçün gedəcəyik. Əsas məqsədim adımı idman tariximizə yazmaqdır.
- İstənilən əyarda medalı hədəfləmisən, yoxsa yalnız çempionluq haqqında düşünürsən?
- Düzdür, əsas fəxri kürsüyə qalxmaqdır. İstənilən medal mənim üçün uğur sayılacaq. Ancaq mən qızıl medala köklənmişəm. Məncə bütün idmançılar çempionluğu hədəfləyərək hazırlaşır. Heç kim hansısa yarışa bürünc və ya gümüş medalı əldə etmək üçün yollanmır. Qismətimizdə nə varsa, o da olacaq.
- Komanda yoldaşlarından kimi daha çox çempionluğa yaxın görürsən?
- Mən bütün yığma üzvlərinə güvənirəm. Heyətimizdə 3 dünya çempionu var. Nəticəsi olmayan boksçumuz yoxdur. Hər çəkidə güclü boksçularımız var. Bu üzdən hər birimiz medala iddia edə bilərik.
- Olimpiya komandamızın bayraqdarı olmağa özünü namizəd sayırsan?
- Yox. Çox tanınmış idmançılarımız var. Toğrul Əsgərov, Rövşən Bayramov, Hacı Əliyev, Məhəmmədrəsul Məcidov və Teymur Məmmədovun adını çəkə bilərəm. Son olimpiya çempionu kimi Toğrulun bayraqdar olmağı daha çox haqq etdiyini düşünürəm. Ənənəni davam etdirmək lazımdır.
- Bu yaxınlarda Məhəmməd Əli dünyasını dəyişdi. Peşəkar boksda ondan daha yaxşı nəticələrə imza atan, hətta heç bir döyüşdə uduzmayan idmançılar olub. Bəs niyə Əli hamıdan çox sevilib və “1 nömrə” sayılır?
- Açığı, peşəkar boksla bir o qədər maraqlanmıram. Amma boks deyəndə ilk yada düşən Məhəmməd Əli olur. O, çox güclü boksçu olub. Texniki və taktiki döyüş üslubuna görə onun tayı-bərabəri olmayıb.
Layihə AFFA yanında Media Komitəsi tərəfindən maliyyələşdirilir
