Nazim Babayev: Olimpiadada medal qazana bilərəm
Ölkəmizi Olimpiadada 3 təkanla tullanmada təmsil edəcək Nazim Babayevin azerisport.az saytına müsahibəsi:
- Ərzurumdakı turnirdə birinci yeri tutdun. Bu yarış haqqında nə deyə bilərsən?
- Yarış böyüklər arasında keçirilirdi. 10 ölkənin idmançıları mübarizə aparırdı. Ancaq orda məndən başqa Olimpiadaya lisenziya qazanmış atlet yox idi. 16,79 metrlik nəticəylə birinci oldum. Zədəli olduğumdan cəmi 1 cəhd etdim. Bu nəticə də qalib gəlməyim üçün kifayət etdi.
- Avropa çempionatına hazırlıq necə gedir?
- İyulun 4-də Hollandiyaya yollanacağıq. Amsterdamdakı qitə birinciliyinə həm qapalı manejdə, həm də ADBTİA-nın stadionunda hazırlaşıram.
- Burda daha yaxşı hazırlaşmaq üçün nə çatmır?
- Olimpiya ili olduğundan lisenziya sahibləri üçün normal şərait yaradılıb. Ancaq ölkə xaricində təlim-məşq toplanışlarında olanda daha effektiv alınır. Burda hər gün evdən məşqə yollanırıq. Xaricdə isə gündə 2 dəfə məşq keçirik, rejimə ciddi riayət edirik. Qidalanma düzgün gedir. Sözsüz, xaricdəki şəraiti burdakıyla müqayisə etmək olmaz. Orda yaxşı bazalar var.
- Bəs burda vitaminlə təmin olunursan?
- Bununla bağlı ölkəmizdə hər hansı problem yoxdur. Azərbaycan Atletika Federasiyası vitaminlə təmin olunmağım üçün hər bir şəraiti yaradıb.
- Ölkədə güclü rəqibinin olmaması daha sürətli inkişafına əngəl törədir?
- Əlbəttə. Ancaq bu problemi yalnız mən yaşamıram. Ümumiyyətlə, Azərbaycanda atletikada ciddi inkişaf nəzərə çarpmır. Dünya səviyyəli idmançılar barmaqla sayılacaq qədərdir. Sözsüz, güclü rəqibim olsaydı, daha yaxşı olardı. Rəqabət inkişafa gətirib çıxarır. Hazırda ölkədaxili yarışlar mənim üçün məşqə bənzəyir. Çox asan keçir.
- Olimpiya stadionu istifadəyə verildikdən sonra atletlərin orda hazırlıq keçəcəyini gözləyirdik. Ancaq deyəsən orda məşq keçmirsiniz?
- Həmin arenanın örtüyü yarış üçün nəzərdə tutulub. Orda çox məşq etmək mümkün deyil. Adamın ayaqları, diz bağları ağrayır. Gənclikdəki bazamızda şərait daha yaxşıdı. Burda həm fiziki məşqlər üçün şərait var, həm də örtük məşqlər üçün münasibdir.
- Lisenziyanı 3 təkanla tullanmada qazanmısan. Uzunluğa tullanmada Olimpiadaya vəsiqə qazanmağa nə mane oldu?
- Əvvəldən 3 təkanla tullanmada yaxşı çıxış edirəm. Uzunluğa tullanmada nəticələrim yaxşı deyil. Amma ölkə daxilində uzunluğa tullanmadada liderəm. Beynəlxalq turnirlərdə yalnız komanda yarışları keçiriləndə uzunluğa tullanmada iştirak edirəm. Əks halda, beynəlxalq arenada sırf 3 təkanla tullanmada mübarizə aparıram.
- Atletikada 3 lisenziya qazanmışıq. Anna Skidan çəkicatmada, Hayle İbrahimov isə qaçışda medal qazanmağa çalışacaq. Komanda yoldaşlarının legioner olması səndə təəssüf hiss doğurmur?
- Yox, buna görə pis olmuram. Bütün idmançılarla münasibətlərim yaxşıdı. Amma istərdim ki, komandada yerli atletlərin sayı çox olsun və xaricdən hansısa idmançını milliləşdirməyə ehtiyac yaranmasın.
- Əslində yaxşı yerli atletlərimiz var. Onlardan biri də hazırda Türkiyəni təmsil edən Ramil Quliyevdi. Bəs indi niyə bu sprinterin davamçısı yetişmir?
- İlk növbədə yüksək nəticə göstərmək üçün anadangəlmə istedadın olmalıdır. İdmançını yaxşı atlet edən 50 faiz istedad, 50 faiz isə məşqdir. Ramildən sonra tələblərə cavab verən sprinter yetişməyib. Ancaq məndən 4-5 yaş kiçik yeniyetmələrdə öz yaş qruplarında yüksək nəticələrə imza atan yeniyetmələrimiz var. İnanıram ki, federasiya onlara qayğı göstərsə, bir neçə ildən sonra böyüklərin yarışında yaxşı çıxış edə bilərlər.
- Hazırda bir çox federasiyalarda maaş və mükafatların ödənilməsiylə bağlı problemlər yaranıb. Sən belə problemlərlə üzləşmirsən?
- Yox. Həm federasiyadan, həm də “Neftçi”dən maaş alıram. Ancaq orta səviyyəli atletlərimizin maaşı azdı.
- Xarici klublardan təklif almısan?
- “Fənərbaxça”dan təklif gəlib. Həmçinin Amerikanın Florida, Miçiqan ştatlarının universitetlərindən də dəvət almışam. Bu ölkədə universitetlər bir növ klub kimi fəaliyyət göstərir. Hər şey nəticəyə bağlıdır. Özümü qarşıdakı məsul yarışlarda yaxşı göstərsəm, transferim baş tuta bilər. Ancaq “Fənərbaxça”ya keçsəm, Türkiyədə hazırlıq keçməyəcəyəm. Məşqlərimi yenə ölkəmizdə davam etdirəcəyəm. Sadəcə, il ərzində 3 yarışda bu klubun adından çıxış edəcəyəm. Bunun üçün Olimpiadaya qədər keçiriləcək böyüklər arasında Avropa çempionatında və gənclər arasında dünya çempionatında uğurlu çıxış etməliyəm. Hazırda gənclər arasında reytinqdə birinciyəm. Özümü mundialda favorit sayıram. Hazırlıq səviyyəm böyüklər arasında Avropa çempionatında medal qazanmağa da imkan verir. AÇ iyulun əvvəllərində Hollandiyada, DÇ isə ayın ortalarında Polşada keçiriləcək.
- Bu yarışlardan sonra Olimpiadada hazırlığı Bakıda davam etdirəcəksən?
- Açığı, çox istərdim ki, ölkə xaricində sərin havası olan məkanda toplanış keçim. Çünki açıq havada məşq etdiyimizdən yüksək temperatur hazırlığımıza mənfi təsir göstərir. Federasiya ilə bununla bağlı danışıqlar aparacağıq. Yəqin ki, arzumuza çatarıq.
- Şəxsi 17,04 metrdi. Bu rekordunu təkrarlaya bilsən Olimpiadada ilk beşlikdə yer ala bilərsən. Rio-2016-da hədəfin nə olacaq?
- Bu il yaxşı hazırlıq keçmişəm. Bu səbəbdən yaxşı formadayam. Rekordumu yeniləyə bilərəm. Ən azı finala yüksələcəyimə inanıram. Hətta Olimpiadada medal da qazana bilərəm. Özümü buna hazırlamışam.
- Əsas rəqiblərin kimlər olacaq?
- Kuba idmançısı hələ ki yarışlarda çıxış etmir. Bilinmir, Olimpiadada iştirak edəcək, ya yox. Amerika atleti bu il yüksək nəticə göstərib. 17,73 metr məsafəyə tullanıb. Çin idmançısının nəticəsi də göz oxşayır.
- Çox gənc yaşda Olimpiadada debüt edəcəksən. Qorxmursan ki, həyəcanının qurbanı olarsan?
- Uşaq yaşlarımdan çıxış etdiyimdən turnirlərdə artıq bir o qədər həyəcanlanmıram. Ancaq Olimpiadanın yeri başqadır. İstər-istəməz həyəcan sözünü deyir. Çünki hər bir idmançının arzusu Olimpiya Oyunlarında iştirak etməkdir. Çalışacam ki, həyəcan hissini təsnifatda yaşayıb, finalda belə problemlə üzləşməyim. Məncə bu məqam mənə mane olmayacaq.
Layihə AFFA yanında Media Komitəsi tərəfindən maliyyələşdirilir
