Açıq Bakı Kriterium yarışında 1-ci mərhələ
15 mart 2014 23:33
Martın 15-də Veloparkda velosiped idmanı üzrə Açıq Bakı Kriterium yarışının birinci mərhələsi start götürüb. Azerisport.az xəbər verir ki, Azərbaycan Velosiped İdmanı Federasiyasının illik təqvim planına əsasən təşkil olunan yarışda federasiyanın nəzdində fəaliyyət göstərən klub və cəmiyyətlərin müxtəlif yaş qrupları üzrə 70-ə yaxın idmançısı iştirak edir.
Ilk günün nəticələrinə gəlincə, 8 saylı İxtisaslaşdırılmış Olimpiya İdman Məktəbinin yetirmələri, Azərbaycanın gənclər yığmasının üzvləri Elgün Əlizadə, Nicat Qarayev və Kənan Qəhrəmanlı digər rəqiblərindən daha yaxşı çıxış edərək ilk 3 pilləni tutublar.
Kriterium yarışlarının birinci mərhələsinin qalibi Elgün Əlizadənin sözlərinə görə, uzunmüddətli qış hazırlığından sonra ilin ilk yarışında əldə etdiyi nəticədən çox razıdır. O, bu uğurun qarşıdakı mötəbər turnirlərdə daha yüksək nailiyyətlər qazanmaq üçün böyük stimul olduğunu da sözlərinə əlavə edib.
Qaliblər Azərbaycan Velosiped İdmanı Federasiyası tərəfindən diplom və pul mükafati ilə təltif ediliblər.
“Açıq Bakı Kriterium yarışının təşkilində əsas məqsəd velosiped idmanının populyarlaşmasına və kütləviliyinə nail olmaq, həmçinin yığma komandalara namizəd velosipedçilərin hazırlıq səviyyəsini yoxlamaqdır”, deyən Azərbaycan Velosiped İdmanı Federasiyasının baş katibi Fərhad Əliyev, daxili yarışlarda iştirak edən velosipedçilərin sayının günü-gündən artdığını xüsusi vurğulayıb. Baş katibin sözlərinə görə, qeyd olunan amil rəqabətin yüksəlməsinə və nəticələrin artmasına şərait yaradır ki, bu da federasiya rəhbərliyinin qarşıya qoyduğu əsas məqsədlərdən biridir.
Martın 16-da yarışlar saat 16:00-da start götürəcək. Həmin gün U-15 və U-17 yaş qrupları üzrə velosipedçilər nəyə qadir olduqlarını nümayiş etdirəcəklər.
(AVİF mətbuat xidməti)
