Azərbaycan üçün AÇ-də növbəti final
18 iyun 2011 18:24
Serbiyanın paytaxtı Belqradda kayak və kanoe üzrə böyüklər arasında Avropa çempionatı davam edir. Azerisport.az xəbər verir ki, bu gün Azərbaycan təmsilçilərindən Valentin Demyanenko 1 nəfərlik qayıqla (C-1) 2009-cu ildə Avropa və dünya çempionu olduğu 200 metr məsafəyə yürüşə qatılıb.
O, seçmə mərhələdə 39,103 saniyə nəticə göstərərək, 1-ci yeri tutub. Bununla da Demyanenko birbaşa əsas finala yüksəlib. Həlledici mərhələ yürüşü iyunun 19-da Bakı vaxtı ilə saat 15:40-da olacaq. Demyanenko ötən gün 500 metr məsafəyə yürüşdə də əsas finala vəsiqə qazanıb. O, iyunun 19-da saat 13:11-də həmin məsafəyə də həlledici yürüşə qatılacaq.
2 nəfərlik kanoe qayığı (C-2) ilə çıxış edən Sergey Bezuqlıy – Maksim Prokopenko dueti isə 3 məsafəyə əsas final yürüşlərindən 1-ini arxada qoyub. Onlar bu gün 1000 metr məsafəyə həlledici yürüşdə 3 dəqiqə 29,760 saniyə nəticə göstərərək, 4-cü yeri tutublar. Aleksey Korovaşkov – İlya Pervuxin (Rusiya) dueti 3 dəqiqə 28,584 saniyə nəticə ilə 1-ci, Andrey və Aleksandr Baqdanoviç qardaşları (Belarus) 3 dəqiqə 28,614 saniyə ilə 2-ci, Viktor Mixalaki – Liviu-Alexandru Lazar-Dumitresku cütlüyü (Rumıniya) isə 3-cü olub.
Bezuqlıy – Prokopenko dueti iyunun 19-da saat 13:50-da 500 metr, saat 16:19-da isə 200 metr məsafələrə əsas final yürüşlərində çıxış edəcək.
Daha bir kanoeçimiz – 1 nəfərlik qayıqla (C-1) çıxış edən Boqdan Kurudz 1000 metr məsafəyə yürüşdə yarımfinal yürüşündə 4 dəqiqə 0,230 saniyə ilə 5-ci nəticə nəticə göstərib. O, ilk “3-lüy”ə düşə bilmədiyi üçün əsas final yürüşündən kənarda qalıb. Bununla belə, Kurudz iyunun 19-da saat 19:55-də 5000 metr məsafəyə əsas final yürüşündə mübarizə aparacaq.
Yeganə qadın təmsilçimiz və yeganə kayakçımız Natalya Fiklisova isə 1 nəfərlik qayıqla (K-1) 500 metr məsafəyə yarımfinal yürüşündə 1 dəqiqə 59,655 saniyə nəticə ilə 9-cu olub və əsas finala çıxa bilməyib.
