Azərbaycan DÇ-in yarımfinalında
5 avqust 2011 18:11
Azərbaycan akademik avarçəkəni Boris Yotov Böyük Britaniyanın Eton şəhərində davam edən yeniyetmələr arasında dünya çempionatında yarımfinal mərhələsinə yüksəlib. Azerisport.az xəbər verir ki, 16 yaşlı idmançımız bu uğura avqustun 5-də 1 nəfərlik qayıqla (JM1X) 1/4final yürüşündə nail olub.
O, 2000 metr məsafəni 7 dəqiqə 19,36 saniyəyə qət edərək, finişə 3-cü çatıb. Zimbabveli Ceyms Freyzer-Makkenzi (7:17.56) və çexiyalı Mixal Ploçekdən (7:19.36) geri qalan Yotov tunisli Məhəmməd Auiti (7:26.60), yeni zelandiyalı Riordan Morrell (7:27.23) və ABŞ təmsilçisi Rayan Alleni (7:32.56) geridə qoyub. Avarçəkənimizilk “3-lüy”ə düşdüyündən, reqlamentə əsasən, növbəti mərhələyə çıxıb. Yotov yarımfinala yüksəlməklə, ilk 12 pillədəki yerlərdən birini təmin edib.
Əvəzində Qardaşxan Hüseynli - Kamal Xanlarov dueti təsəlliverici yürüşdə də aşağı nəticə göstərib. Onlar 2000 metr məsafəni 7 dəqiqə 9,69 saniyəyə qət edərək, finişə sonuncu çatıblar. İlk 4 yeri müvafiq olaraq, litvalı Dominikas Yançionis – Vitautas Lapatiukas (6:36.83), böyük britaniyalı Edvard Qrisedal – Cozef Qappi (6:36.94), ukraynalı Nikolay Mazur – Roman Matviyçuk (6:37.75) və zimbabveli Mixael Conson – Peter Pursell-Cilpin (6:58.14) duetləri tutub. Hüseynli – Xanlarov cütlüyü 13 – 24-cüyerlərdən birini tutmağa imkan verən C (D)yarımfinalındaiştirak edəcək.
Qeyd edək ki, dünya çempionatına avqustun 7-də yekun vurulacaq.
