Azərbaycan DÇ-nin 1/4 finalında
29 avqust 2011 14:02
Avqustun 28-də Sloveniyanın Bled şəhərində akademik avarçəkmə üzrə kişi və qadınlar arasında 2012-ci il London Yay Olimpiya Oyunlarına lisenziya xarakterli dünya çempionatı start götürüb. Azerisport.az xəbər verir ki, yarışda çıxış edən Azərbaycan avarçəkənləri ilkin mərhələni adlamağı bacarıblar.
Olimpiya təyinatlı qayıqlarla kişilərin mübarizəsində 1 nəfərlik qayıqda (M1X) yer alan Aleksandr Aleksandrov seçmə yürüşdə 2000 metr məsafəni 6 dəqiqə 58,06 saniyəyə qət edərək, finişə 3-cü çatıb. O, yeni zelandiyalı Meyh Drizdeyl (6:52.30) və xorvatiyalı Mario Vekiçdən (6:54.48) geri qalsa da, ötənilki dünya çempionu, İranın milliyyətcə azərbaycanlı avarçəkəni Mohsen Şadi Naqade (7:04.49), italiyalı Leopoldo Sansone (7:13.83) və israilli Dani Fridmanı (7:14.40) qabaqlamağı bacarıb. Qaydalara əsasən, Aleksandrov ilk “3-lüy”ə düşdüyündən, ¼ finala vəsiqə qazanıb.
Qadınların mübarizəsində Nataliya Mustafayeva 1 nəfərlik qayıqla (W1X) yürüşdə finişə 4-cü çatıb. O, 2000 metr məsafəni 7 dəqiqə 45,69 saniyəyə çatıb. Belaruslu Yekaterina Karsten (7:25.57), çexiyalı Mirka Knapkova (7:25.67) və litvalı Donata Vistartaytedən (7:33.09) geri qalan Mustafayeva ÇAR təmsilçisi Heyli-Jo Artur (7:53.18) və ispaniyalı Nuria Dominges Asensionu (7:54.40) üstələyib. Mustafayeva ilk 2 yerdən birini tuta bilmədiyindən, mübarizəni təsəlliverici yürüşdə davam etdirəcək.
Kamal Məmmədov isə qeyri-olimpiya tipli - 1 nəfərlik yüngül çəkili (LM1X) qayıqla seçmə yürüşdə 4-cü olub. O, 2000 metr məsafəni 7 dəqiqə 18,57 saniyəyə qət edib. Məmmədov yeni zelandiyalı Dankan Qrant (7:08.34), almaniyalı Conatan Kox (7:12.91) və misirli Abdel Mohsen Massuddan (7:15.18) geri qalsa da, sloveniyalı Rayko Hrvat (7:19.61) və türkiyəli Hüseyin Kandemiri (7:20.67) qabaqlayıb. Avarçəkənimiz mübarizəni təsəlliverici yürüşdə davam etdirəcək.
Dünya çempionatına sentyabrın 4-də yekun vurulacaq.
Qeyd edək ki, Aleksandr Aleksandrov ilk “11-liy”ə, Nataliya Mustafayeva isə ilk “9-luğ”a düşəcəyi halda, London olimpiadasına lisenziya qazanacaq.
