Azərbaycan yığması Prezident Kubokunun qalibi oldu
9 aprel 2013 12:46
Mingəçevir şəhərindəki “Kür” Olimpiya Tədris-İdman Mərkəzində Gənclər və İdman Nazirliyinin və Azərbaycan Milli Avarçəkmə Federasiyasının birgə təşkilatçılığı ilə akademik, kayak və kanoe qayıqlarında avarçəkmə üzrə kişi və qadınlar arasında VI Beynəlxalq “Prezident Kuboku” reqatası başa çatıb. Azerisport.az xəbər verir ki, yarışda Azərbaycan, Türkiyə, Rusiya və Gürcüstanın 100-dən artıq idmançısı avarçəkmənin akademik, kayak və kanoe növləri üzrə mübarizə aparıb.
Akademik avarçəkmə üzrə 2000 metr məsafəni 1 nəfərlik qayıqla 23 yaşlı kişilər arasında Aleksandr Aleksandrov (Azərbaycan), qadınlardan Yana Kurugina (Rusiya), 18 yaşlı kişilər arasında Arçil Bayaşvili (Gürcüstan), 2 nəfərlik qayıqlarla 23 yaşlı kişilər arasında Aleksandr Aleksandrov, Boris Yotov (Azərbaycan), 4 nəfərlik qayıqla 18 yaşlı kişilər arasında Röyal Məmmədov, Babək Abbasov, Mehman Abdullayev, Pənah Məmmədov birinci yeri tutublar.
Kayak və kanoeçilərin mübarizəsində kişilər 1 nəfərlik və 2 nəfərlik, qadınlar isə 1 nəfərlik qayıqlarla 1000 metr, 500 metr və 200 metr məsafələrə yürüş ediblər. Qadın kayakçıların mübarizəsində Türkiyə təmsilçisi Avçi Hilal 1 nəfərlik qayıqla 500 metr və 200 metrlik məsafələri hamıdan birinci dəf edib. Kişi kayakçıların yarışında Azərbaycan idmançısı Mirnazim Cavadov 1000 metr və 200 metr məsafəyə yürüş zamanı hamıdan birinci olub. İki nəfərlik qayıqla 1000 metr məsafədə Aleksandr Piçugin-Möhemmed Tahir Hövseni Avşar dueti, 200 metr məsafəyə yürüşlərdə isə Mirnazim Cavadov-Tamerlan Əhmədov dueti qızıl medal qazanıblar. 1000 metr məsafəyə 1 nəfərlik qayıqla 23 yaşlı kişilər arasında Mirnazim Cavadov (Azərbaycan), 2 nəfərlik qayıqla 18 yaşlı oğlanlar arasında Aydemir Gokhan (Türkiyə), 2 nəfərlik qayıqla 23 yaşlı kişilər arasında Möhemmed Tahir Hövsini Avşar, Aleksandr Piçugin (Azərbaycan), 1 nəfərlik qayıq 18 yaşlı oğlanlar arasında Kose Safa (Türkiyə), 500 metr məsafəyə 2 nəfərlik qayıqla 18 yaşlı oğlanlar arasında Gokan Aydemir, Mert Yildırım (Türkiyə), 2 nəfərlik qayıqla 23 yaşlı kişilər arasında Kuru Öztürk, Yıldırım Çağırbey (Türkiyə), 1 nəfərlik qayıqla 18 yaşlı qadınlar arasında Avçi Hilal (Türkiyə), 200 metr məsafəyə 1 nəfərlik qayıqla 23 yaşlı kişilər arasında Mirnazim Cavadov (Azərbaycan), 1 nəfərlik qayıqla 18 yaşlı kişilər arasında Kose Safa (Türkiyə), 2 nəfərlik qayıqla 23 yaşlı kişilər arasında Mirnazim Cavadov, Tamerlan Əhmədov (Azərbaycan), 1 nəfərlik qayıqla 18 yaşlı qadınlar arasında Avçı Hilal (Türkiyə) birinci yeri tutublar.
Kanoeçilərin mübarizəsi isə daha gərgin şəraitdə keçib. 1000 metr məsafəyə 1 nəfərlik qayıqla 23 yaşlı kişilər arasında Azərbaycan yığmasının üzvü Taras Matveyçuk, 500 metr məsafəyə yürüşdə Anatoli Melnik, 18 yaşlı kişilər arasında isə Aleksey Kuprin 500 metr və 200 metr məsafəyə yürüşdə birinci olublar. 1000 metr məsafəyə 1 nəfərlik qayıqla 23 yaşlı kişilər arasında Taras Matveyçuk (Azərbaycan), 1 nəfərlik qayıqla 18 yaşlı kişilər arasında Aleksey Kuprin (Azərbaycan), 500 metr məsafəyə 1 nəfərlik qayıqla 23 yaşlı kişilər arasında Anatoli Melnik (Azərbaycan), 1 nəfərlik qayıqla 18 yaşlı kişilər arasında Aleksey Kuprin (Azərbaycan), 200 metr məsafəyə 1 nəfərlik qayıqla 23 yaşlı kişilər arasında Zaza Naderadze (Gürcüstan) birinci yeri tutublar.
Ümumi komanda hesabında isə Azərbaycan idmançıları birinci, Türkiyə komandası ikinci, Gürcüstan və Rusiya avarçəkənləri isə müvafiq olaraq üçüncü-dördüncü yerləri tutublar.
Yarışda fərqlənən idmançılar diplom və medallarla təltif ediliblər. Sonda Azərbaycan komandasına “Prezident Kuboku” təqdim olunub.
