Azərbaycan yığması qələbə ilə başladı (FOTOLAR)
8 may 2013 13:34
Mingəçevirdəki “Kür” İdman-Sağlamlıq Mərkəzində ümummilli lider Heydər Əliyevin 90 illik yubileyinə həsr olunmuş vaterpolo üzrə beynəlxalq turnir start götürüb. Azerisport.az xəbər verir ki, Azərbaycan Üzgüçülük Federasiyası və Azərbaycan Respublikasının Gənclər və İdman Nazirliyi tərəfindən birgə təşkil olunmuş yarışda Azərbaycan və Belarus milli yığma komandaları, həmçinin Gürcüstanın gənclərdən ibarət komandası və Moskva yığması iştirak edir.
Azərbaycan Üzgüçülük Federasiyasının mətbuat xidmətinin verdiyi məlumata görə, turnirin açılış mərasimində Mingəçevir şəhər icra hakimiyyətinin başçısının müavini Ramiz Əliyev çıxış edərək, bütün iştirakçılara uğurlar arzulayıb, qələbəyə layiq olanların uğur qazanacağına ümid etdiyini bildirdi və Azərbaycanın artıq dünyanın idman mərkəzlərindən birinə çevrildiyini qeyd etdi.
Azərbaycan Respublikasının Gənclər və İdman Nazirliyinin sektor müdiri Nicat Həsənov isə ümummilli lider Heydər Əliyevin 90 illik yubileyinə həsr olunmuş beynəlxalq turnirin başlanması münasibətilə iştirakçıları təbrik etdi və ölkəmizin son vaxtlar bir çox beynəlxalq turnirlərə ev sahibliyi etdiyini qeyd etdi. Nazirlik nümayəndəsi eyni zamanda onu da bildirdi ki, Azərbaycan yaxın gələcəkdə Beynəlxalq Şahmat Olimpiadası və Avropa Oyunları kimi iri yarışları yüksək səviyyədə təşkil edəcək.
Azərbaycan Üzgüçülük Federasiyasının baş katibi Fərid Bananyarlı açılış mərasimində çıxış edərək, Heydər Əliyevin 90 illik yubileyinə həsr olunmuş beynəlxalq turnirin bütün qonaqlarını salamladı və bu yarışın ənənəvi xarakter daşıyacağını bildirdi. Nitqin sonunda Federasiya nümayəndəsi bütün iştirakçılara uğurlar arzuladı və qələbəyə layiq olanların uğur qazanacağına ümid etdiyini vurğuladı.
Turnirin ilk turuna gəldikdə, Azərbaycan millisi Belarus komandası ilə qarşılaşdı və gərgin mübarizə şəraitində keçən qarşılaşmada yığmamız 18:17 (2:4, 5:5, 4:3, 7:5) hesabılə qələbə qazandı. Turun ikinci oyununda Moskva yığması Gürcüstanın gənclərdən ibarət komandasını 17:5 hesabılə məğlub etdi. Sonda qeyd edək ki, yarışın ikinci günündə Azərbaycan millisi gürcülərlə, belaruslar isə moskvalılarla üz-üzə gələcəklər.
