“Azərbaycanın qazandığı medalların sayı əvvəlki illərlə müqayisədə təxminən 2 dəfə artıb”
4 iyul 2012 02:04
“Bakı şəhərinin 2016-cı və 2020-ci il Yay Olimpiya Oyunlarına ev sahibliyi etmək hüququ uğrunda mübarizəyə qoşulması ölkəmizdə idmanın inkişafının bariz sübutudu”. Azerisport.az xəbər verir ki, bunu Heydər Əliyev Mərkəzində çərşənbə axşamı XXX London Yay Olimpiya Oyunlarında iştirak edəcək Azərbaycan nümayəndə heyətinin yola salınması mərasimində çıxışı zamanı gənclər və idman naziri Azad Rəhimov deyib.
Nazir qeyd edib ki, Bakı şəhəri namizəd şəhər mərhələsini keçə bilməsə də, iddiaçı şəhər mərhələsində böyük iş aparıldı: "İnanırıq ki, bu sahədə qazanılan təcrübə gələcək olimpiadalar uğrunda mübarizədə öz sözünü deyəcək. Artıq növbəti - London Olimpiya Oyunlarına çox az vaxt qalır. Sevindirici haldı ki, müstəqil respublikamızın Olimpiya yığma komandası belə möhtəşəm bir tədbirdə əvvəlki olimpiadalarla müqayisədə daha geniş tərkibdə - 53 idmançı ilə təmsil olunacaq. Ölkəmizdə idmanın inkişaf etdirilməsi, Olimpiya hərəkatının genişləndirilməsi, yeni idman və Olimpiya komplekslərinin tikilməsi zərurəti, eləcə də idmançılarımızın London olimpiadasında, dünya və Avropa çempionatlarında yüksək göstəricilərinin təmin edilməsi məqsədi ilə 2012-ci ilin ölkəmizdə "İdman ili" elan edilməsi də Olimpiya Oyunlarına hazırlıq prosesinə olduqca müsbət təsir göstərib”.
“Bu gün Azərbaycan dünyanın idman mərkəzlərindən biri kimi nüfuzlu idman tədbirlərinə ev sahibliyi edir. Belə ki, 2011-ci ildə respublikamızda 36 beynəlxalq yarış təşkil edilib. Bu ilin 6 ayı ərzində isə artıq 28 beynəlxalq yarışa ev sahibliyi etmişik. Bu günədək 126 respublika tədbiri keçirilib. 217 beynəlxalq tədbirdə, 79 təlim-məşq toplanışında yığma komandalarımızın iştirakı təmin edilib. Olimpiadaya hazırlıq dövründə təşkil edilərək keçirilmiş yarışlar Azərbaycanımızın təbliği baxımından da əhəmiyyətli olub. Xüsusilə may ayında ümummilli lider Heydər Əliyevin xatirəsinə həsr olunmuş, 4 kontinental, 4 milli və 12 qarışıq kollektivdə ümumilikdə 180 idmançının iştirak etdiyi 23 yaşadək velosipedçilər arasında 5 mərhələli beynəlxalq veloyürüşü qeyd etmək lazımdı”.
Nazir vurğulayıb ki, Olimpiya idman növləri üzrə qazanılmış medalların sayında da dinamik inkişaf müşahidə olunur: “Belə ki, bu rəqəmələr Atlanta olimpiadası ərəfəsində (1993-1996-cı illər) 71, Sidney olimpiadası ərəfəsində (1997-2000-ci illər) 146, Afina olimpiadası ərəfəsində (2001-2004-cü illər) 262, Pekin olimpiadası ərəfəsində (2005-2008-ci ilin 7 ayı) 467, London olimpiadası ərəfəsində isə (2009-2012-ci ilin 6 ayı) 835 olub. "Göründüyü kimi, hər dəfə olimpiada ərəfəsində Olimpiya idman növlərində qazanılan medalların sayı əvvəlki Olimpiada ilə müqayisədə təxminən 2 dəfə artıb. Xüsusilə qeyd etmək istərdim ki, əgər Pekin Olimpiya Oyunlarında Azərbaycan 44 lisenziya qazanaraq 11 idman növündə təmsil olunurdusa, Londonda 53 lisenziya ilə 16 idman növündə təmsil olunacaq".
Onun sözlərinə görə, ümumiyyətlə isə, London olimpiadasında Azərbaycan müstəqillik tarixində ilk dəfə olaraq 5 yeni - kanoe, akademik qayıqlarda avarçəkmə, velosiped idmanı, idman gimnastikası və qılıncoynatma idman növlərində də təmsil olunacaq. Pekində Azərbaycanı 1 hakim (güləş) təmsil edirdisə, Londona 5 hakimimiz (2 güləş, gimnastika, boks və ağırlıqqaldırma) yollanacaq. Bundan başqa, idmançılarımızla yanaşı 6 həkim, 29 məşqçi də komandamızın heyətində Londona gedəcək. Londonda ölkəmizi təmsil edəcək 53 idmançıdan 41-i ilk dəfə Olimpiya Oyunlarının iştirakçısı olacaq. Komandamız daha geniş beynəlmiləl tərkibə malikdir və əsasən titullu idmançılardan ibarətdir. Onların əksəriyyəti qatıldıqları beynəlxalq nüfuzlu idman yarışlarında lisenziya qazanmaqla yanaşı, eyni zamanda həmin yarışların qalibi olaraq dünya və Avropa çempionları adına layiq görülüblər.
"Sevindirici haldır ki, komandamızın tərkibində müstəqillik dövründə dünyaya gəlmiş və ilk dəfə ölkəmizi olimpiadada təmsil edəcək gənc idmançılarımız da var. Nümayəndə heyətimiz 2 qrupda - birinci qrup iyul ayının 24-də, ikinci qrup isə avqust ayının 4-də Londona yola düşəcək. İdmançılarımızın yerləşəcəyi Olimpiya kəndində 25 iyul tarixdə Azərbaycan komandasının salamlanması - Azərbaycan bayrağının qaldırılması mərasimi keçiriləcək. İyulun 28-də keçiriləcək Azərbaycan Gününün hazırlıq işləri də başa çatmaq üzrədi. Bu tədbirdə Beynəlxalq Olimpiya Komitəsinin, bir çox milli Olimpiya komitələrinin və beynəlxalq federasiyaların nümayəndələrinin iştirakı gözlənilir”.
