İlham Əliyev: Azərbaycan dünyada idman ölkəsi kimi tanınır
20 iyul 2013 00:44
Xəbər verdiyimiz kimi, Azərbaycan Respublikasının Prezidenti İlham Əliyev iyulun 19-da Xaçmaz Olimpiya İdman Kompleksinin açılış mərasimində iştirak edib. Azerisport.az xəbər verir ki, dövlətimizin başçısı kompleksin rəmzi açılışından və tanışlıqdan sonra rayon ictimaiyyətinin nümayəndələri ilə görüşüb.
Xaçmaz ictimaiyyətinin nümayəndələrini salamlayan İlham Əliyev ölkəmizdə idmanın sürətlə inkişafından da danışıb: “Azərbaycanda idmanın inkişafı sürətlə gedir və belə komplekslərin yaradılması əslində idmanın kütləviliyini də təmin edir. Ancaq, eyni zamanda, adi vətəndaşlar da idmanla məşğul olmalıdılar. Çünki idman sağlamlıq, sağlam həyat tərzi deməkdi. Belə komplekslərin tikilməsi bu imkanları da yaradır. Burada üzgüçülük hovuzları, açıq meydançalar, idman zalları, trenajor zalları var. Yəni, gənclər, uşaqlar, yeniyetmələr, yaşlı nəsil də istifadə etməlidi.
Xaçmazda böyük Olimpiya kompleksinin tikilməsi lazım idi. Çünki artıq başqa şəhərlərdə komplekslər var və bu, sayca 38-cidi. Bu, onu göstərir ki, indi ölkəmizin bütün bölgələrində idmanla məşğul olmaq üçün yaxşı imkanlar var. İdmançılarımız da bizi sevindirirlər. Bu yaxınlarda universiadada idmançılarımız çox böyük uğurlara imza atıblar - 15-ci yerə layiq görülüblər, 16 medal qazanmışıq və Avropa ölkələri arasında 9-cu, müsəlman ölkələri arasında isə 1-ciyik. Keçən il London Yay Olimpiya Oyunlarında idmançılarımız tarixi qələbə qazandılar. Yəni, idmanın inkişafı Azərbaycanda sürətlidi, hərtərəflidi və indi dünyada Azərbaycan idman ölkəsi kimi tanınır.
Əlbəttə, idmanın kütləviliyini təmin etmək, gənc, peşəkar kadrları hazırlamaq üçün belə imkanlar lazımdı. Bu kompleks ən yüksək dünya standartlarına cavab verir və burada idmanla məşğul olmaq üçün bütün şərait var, bir də ki, Xaçmaz şəhərinə yaraşıq verir”.
