Milli idman mərc oyunları ilə bağlı bütün incəliklər açıqlandı
18 января 2011 15:12
“Topaz” markası altında fəaliyyətə başlayan mərc oyunlarına bu gün - 18 yanvar 2011-ci il tarixindən etibarən start verildi. Azerisport.az xəbər verir ki, bununla da, idmansevərlər, xüsusilə də futbolla maraqlanan insanlar asudə vaxtlarını daha maraqla keçirib, futbol biliklərini yoxlayıb, eyni zamanda qazanc əldə edə bilərlər.
Qeyd edək ki, qazanılan bütün uduşların tam şəkildə qaliblər tərəfindən əldə ediləcəyinə təminat verilir. Oynamaq istəyənlər hələlik Bakı və Abşeron yarımadasında, sonradan isə bütün Azərbaycan ərazisində “Topaz” satış məntəqələrinə yaxınlaşaraq, istədikləri idman oyunlarına müxtəlif kombinasiyalar qura bilərlər.
Ən önəmli məqamlardan biri dövlətin bu oyundan vergi əldə etməsidir. “Topaz” nəinki idmanın inkişafına yardımçı olacaq, həm də dövlət büdcəsinə ödəyəcəyi vergilərlə Azərbaycan iqtisadiyyatının möhkəmlənməsinə öz töhvəsini verəcək. Belə ki, 29 dekabr 2010-cu il tarixində Azərbaycan Respublikasının Nazirlər Kabinetinin idman mərc oyunlarının həyata keçirilməsi fəaliyyətinin vergi öhdəliklərini tənzimləyən 245 nomrəli qərarı qəbul edilib. Bu qərar Azərbaycan Respublikası Nazirlər Kabinetinin 1 Mart 2001-ci il tarixli 55 nomrəli qərarına əlavədir.
“Topaz” bukmeker kontorlarının fəaliyyətə başlaması ilə bağlı bu gün keçirilən mətbuat konfransında “Azəridmanservis”in baş direktoru Azər Məhərrəmov bildirib ki, Bakı və Abşeronda 70 yerdə “Topaz” brendi altında kontorlar fəaliyyətə başlayacaq: “Bu gündən etibarən Bakıda agent məntəqələri fəaliyyətə başlayacaq. Daha sonra Azərbaycanın bölgələrində də bu işə start veriləcək. Əsas odur ki, Azərbaycan idmanı bu işdən faydalansın. Pul qoyuluşu telefon-internet şəbəkəsi vasitəsilə də mümkün olacaq. Ən azı 3 oyuna pul qoyuluşu mümkün olacaq. Amma gələcəkdə bu rəqəm iki və ya dörd də ola bilər”.
Mətbuat konfransında Azərbaycan Premyer Liqasına da pul qoyuluşu diqqət mərkəzində olub. Lakin Məhərrəmov bildirib ki, sadəcə Azərbaycan klubları beynəlxalq yarışlarda iştirak edən zaman həmin oyunlara pul qoyuluşu mümkün olacaq. Milli çempionatın oyunları üçün isə bu, mümkün olmayacaq.
Bu oyunlardan gələcək gəlirin 4.2 faizi yerli idmana yönəldiləcək. Həmin pulun 30 faizi AFFA-ya, qalan 70 faizi isə digər idman növlərinə yönəldiləcək. Ümumi gəlirdən 6 faizi vergilərin ödənilməsinə sərf olunacaq. Minimum pul qoyuluşu 1 manat, maksimum uduş isə 250 min manat ola bilər. Pul udmuş şəxs uduşunu oyun bitəndən sonra götürə biləcək. Buna dövlət səviyyəsində təminat verilir.
Azərbaycanda idman mərc oyunlarını həyata keçirəcək “Azinteltek” Qapalı Tipli Səhmdar Cəmiyyətinini sədri Ahmet Sezer isə bildirib ki, ən azı 3 oyuna pul qoyuluşunun edilməsi daimi xarakter almayacaq. Sezer gələcək hədəflərinin pul qoyuluşunu minimum 1 matçadək azaltmaqdan ibarət olduğunu vurğulayıb. “Topaz”ın əmsalları isə dünyaca tanınmış bukmeyker şirkətlərinin müəyyənləşdirdiyi əmsallardan fərqlənməyəcək.
Türkiyədə “İddaa” adlı idman mərc oyunlarını həyata keçirən “İnteltek” şirkətini 2004-cü ildə qurduqlarını deyən Sezer 7 ildə 17 milyon dollarlıq dövriyyə ilə dünyada ikinci yeri tutduqlarını açıqlayıb.
Məhərrəmovun sözlərinə görə, “qara bazar”da fəaliyyət göstərən bəzi əcnəbi bukmeker kontorlarına girişin bağlanılması üzərində iş gedir. Onun fikrincə, görülən işlər qısa zamanda bəhrəsini verəcək. Əvəzində “Topaz”ın saytı açılacaq. Bu isə insanlara evdən çıxmadan internet vasitəsilə pul qoyuluşu etməyə şərait yaradacaq.
