Bakıda FİDE-nin Prezident Şurası işə başlayıb
6 may 2013 11:53
Mayın 5-də “JW Marriott Absheron Baku” otelində Beynəlxalq Şahmat Federasiyasının (FİDE) Prezident Şurası işə başlayıb. Azerisport.az xəbər verir ki, Şuranın işində FİDE-nin prezidenti Kirsan İlyumjinov, bir sıra ölkələrin federasiyalarının başçıları iştirak edirlər.
Azərbaycan Şahmat Federasiyasının prezidenti Elman Rüstəmov açılışda çıxış edərək Azərbaycanda şahmatın inkişafından, idmanın bu növünə dövlət qayğısından danışıb. O, Azərbaycanda şahmatın inkişafında ümummilli lider Heydər Əliyevin misilsiz xidmətlərini vurğulayıb.
FİDE-nin prezidenti Kirsan İlyumjinov Azərbaycanda şahmatın kütləviliyinin inkişafına və genişlənməsinə dövlət səviyyəsində göstərilən diqqət və qayğını yüksək qiymətləndirərək deyib: “Azərbaycan MDB-nin postsovet məkanında yeganə ölkəsidir ki, şahmatın inkişafına dair Dövlət proqramı qəbul edilib”.
Sonra FİDE-nin Prezident Şurası gündəlikdəki məsələlərin müzakirəsinə başlayıb. İclasda Londonda FİDE namizədlərinin sonuncu turnirinin yekunlarını, habelə Azərbaycanda keçiriləcək 2015-ci ilin Dünya kuboku yarışlarının və 2016-cı il Dünya Şahmat Olimpiadasının təşkilati planlarını və s. müzakirə etmək nəzərdə tutulur.
FİDE Prezident Şurasının üzvləri mayın 6-da Fəxri xiyabana gedərək ümummilli lider Heydər Əliyevin xatirəsini anacaq, Dünya Kuboku yarışlarının keçiriləcəyi “Baku Crystall Hall” ilə tanış olacaq, jurnalistlərlə görüşəcəklər.
