“Xəzər Lənkəran yeni tarix yazmaq istəyir”
26 июня 2011 11:08
Bir qayda olaraq futbol klublarında bəzi adamlar kölgədə qalır. Bunlara tərcüməçilər də aiddi. Azərbaycan futbolunda çoxlarının tanıdığı bir neçə tərcüməçi var. Onlardan biri “Xəzər Lənkəranda” çalışan Elvar Quliyevdi. Quliyev artıq bir ildi ki, klubun məşqlərində və oyunlarda baş məşqçi Mirça Rednikə kömək edir. Azerisport.az-a müsahibəsində o, özü ilə yanaşı Rednik və “Xəzər Lənkəran” haqda da danışıb.
- Oxucularımıza özünüz haqda danışın.
- Mən sentyabrın 20-si 1981-ci ildə Lənkəranda anadan olmuşam. 1998-ci ildə ispan dili fakültəsini seçərək “Xarici dillər universiteti”nə daxil olmuşam. Hələ uşaqlıqdan məhz bu ali təhsil ocağında təhsil almağı arzulayırdım. Futbolda tərcüməçi kimi “Bakı”da işləməyə başlamışam. 2005-ci ildə o zaman “zolaqlılar”ı çalışdıran Əsgər Abdullayevlə işləməyə başladım. Daha sonra mənə “Araz” futzal klubunda işləməyi təklif etdilər. Çimərlik futbolu üzrə komandaya rəhbərlik edən braziliyalı mütəxəssis Qustavo Silva ilə də işləmək çox maraqlı idi. Bundan başqa iki il “Space” telekanalında jurnalist və aparıcı işləmişəm. 2008-ci ildən isə “Xəzər Lənkəran”da işləyirəm.
- Belə bir komandada işləmək çətin deyil ki?
- “Xəzər Lənkəran”da işləməyimə şadam. Öz işimi sevirəm və buna böyük məsuliyyətlə yanaşıram. Bəzən adamlar hamı ilə necə əlaqə saxlamağımla maraqlanır. Axı mənə çox zənglər gəlir. Təsəvvür edin, jurnalistlər, azarkeşlər, məşqçilər zəng edir. Jurnalistlərə futbolçulardan müsahibə götürməyə kömək edirəm. Bunu sevinclə edirəm.
- Siz braziliyalılar, rumınlar və başqa legionerlərlə əlaqə saxlamağı necə bacarırsınız?
- Yeni işə başlayanda çətinliklər yaranır. Mən artıq bir neçə ildi tərcüməçi işləyirəm və hər il təcrübəm artır. Bir neçə xarici dil bilirəm. Talışca da danışa bilirəm. Doğma dilimizdən başqa ispan, ingilis, portuqal, rus, türk və fransız dillərini bilirəm. Bir ilə yaxın rumınlarla işləmişəm və artıq onların dilini bilirəm. Ümid edirəm ki, növbəti mövsümün sonuna qədər rumın dilini də Rednikin köməyi ilə öyrənə biləcəyəm.
- Belə olan halda siz oyunçulara məşqçinin doğma dilində işətdiyi terminləri də izah edə bilirsiniz...
- Mən özüm jurnalist işləmişəm və futbolu bilirəm. Buna görə də terminlər mənim üçün çətinlik törətmir. Özü də hər şeyi yüksək səviyyədə etməyə çalışıram. Bəziləri mənim futbol fanatı olduğumu bilmir. Hələ “Xəzər Lənkəran”a gələnə qədər bu komandaya azarkeşlik edirdim. Bizim hər mövsüm hamını sevindirməyə borclu olan mehriban ailəmiz var.
- Bir insan kimi Mirça Rednik haqda nə deyə bilərsiniz?
- O, özünəməxsus insan və yaxşı məşqçidi. Mütəxəssisləri müqayisə etməyi xoşlamıram, amma hamı onun əslində necə olduğunu görür. Qısa müddət ərzində onu Lənkəranda çox seviblər. Komandanın azarkeşləri ona sadəcə məftundurlar. Rednik çox diqqətcil və tələbkar adamdı. Qalib olmağı sevir. Rednikin məşqləri çox maraqlı və müxtəlifdi. O, topla məşqlərə xüsusi diqqət ayırır. Onunla işləmək həm mənim və həm də futbolçular üçün zövqdü. Təsəvvür edin ki, əgər komandanın oyunçularından kiminsə əhvalı pərişandırsa, o, dərhal məsələnin nə yerdə olduğunu soruşur və kömək etmək istəyir. Yaxşı məşqçi keyfiyyətləri ilə yanaşı o, həm də gözəl insandı.
- Məşhur portuqaliyalı mütəxəssis Joze Mourinyo məşqçi olmamışdan qabaq tərcüməçi idi...
- Bu barədə bəzən mənə deyirlər. Futbolu çox sevirəm. Bu idman növünə çox vaxt ayırıram. Ancaq məşqçi olmaq haqda hələ düşünməmişəm. Hərgah, əlbəttə, mənə nə vaxtsa tərcüməçi işinə son vermək lazım gələcək.
- Mirça Rednikə bu mövsüm ən çox nə xoş gəldiyini bilmək maraqlı olardı...
- O, “Xəzər Lənkəran” azarkeşlərini sevdi. Onlar doğrudan da böyük qələbələrə layiqdilər. Hesab edirəm ki, bizim azarkeşlər Qafqazda ən yaxşı azarkeşlərdi. Axı əsl fanat həmişə komandanın yanındadı. “Xəzər Lənkəran” azarkeşləri isə qələbə və hətta məğlubiyyətdən sonra belə komandanı həmişə dəstəkləyir. Bizim uğurlarımızda azarkeşlərin rolu var. Onlar bizi mövsüm boyu dəstəkləyir.
- Qeyd etdiyiniz kimi, sizə bir çox mütəxəssislərlə işləməli olmusunuz. Onlardan kimlə daha çətin olub?
- Hər birinin öz tələbi var. Onları müqayisə etmək istəməzdim. Hazırda Redniklə işləyirəm və komandada belə bir adamla olmaq mənə xoşdu.
- Klub rəhbərliyi komanda qarşısında Avropa Liqasının qrup mərhələsinə düşmək məqsədi qoyub...
- Hamı bizdən Avropa Liqasında qələbələr gözləyir. Biz yeni tarix yazmaq istəyirik. “Xəzər Lənkəran” istənilən rəqibə qarşı oynaya bilər. Əsas qələbə istəyidi. Biz hamımız qrup mərhələsinə düşmək istəyirik. Ancaq buna qədər üç mərhələ keçmək lazım gələcək. Komandaya inanıram və azarkeşlərdən dəstək gözləyirəm. Birlikdə biz uğurlar qazanacağıq.
- “Xəzər Lənkəran” Avropa Liqasında uğurla çıxış edə bilər?
- Biz hamımız buna görə çalışırıq. Komandada özümüzü göstərməyə imkan verən potensial var. İnanıram ki, “Xəzər Lənkəran” hamını sevindirəcək. Bütün futbolçular Avropa arenasında bacardıqca yaxşı oynamaq istəyirlər. Lənkəranda bizdən ancaq qələbə gözləyirlər. Özü də biz ev oyununu bu şəhərdə azarkeşlərimiz qismində 12-ci oyunçuyla keçirəcəyik.
