Danilo Dias: Tventeni keçmək mümkündür və lazımdı
"Qarabağ"ın futbolçusu Danilo Dias "Tvente" ilə 0:0 hesabıyla başa çatan Avropa Liqasının pley-off mərhələsindəki ilk oyundan sonra təəssüratlarını azerisport.az-la bölüşüb.
- "Tvente" ilə oyunun nəticəsindən razı qaldın?
- Komandamız sona qədər mübarizə apardı. Rəqib müdafiədən oynayırdı. Bununla belə bir neçə qol vəziyyətimiz oldu. Sadəcə, həmin imkanlardan istifadə etmədik. Yaxşı olardı ki, qələbə qazanaq. Amma qolsuz bərabərlik pis nəticə deyil. Səfərdə rəqib belə oynamayacaq. Bunu nəzərə alaraq biz də fərqli oyun nümayiş etdirəcəyik.
- "Qarabağ"ın qələbə qazanmasına nə mane oldu?
- Ən böyük səbəb özümüzük. Daha dəqiq oynamaq olardı. Bəxt bizim tərəfdə olmadı. Digər tərəfdən ot örtüyünün vəziyyətini gördüz. Bu meydanda normal oynamaq çox çətin idi. Əksər yerlərdə ot yox idi. Stadionun belə vəziyyətdə olması çox acınacaqlıdı.
- "Tvente" doğma meydanda daha inamlı görünəcək. "Qarabağ"ın qol vurması çətin olacaq...
- Mümkünsüz heç nə yoxdu. Sadəcə, öz oyunumuzu oynamalıyıq. Bu oyunla da səfərdə uğur qazanmaq olar. "Tvente"ni keçmək mümkündür və lazımdı.
- Əgər qol olsaydı, "Qarabağ" səfərə üstün durumda yollanacaqdı?
- 0:0 hesabı heç kimə üstünlük vermir. Onların buradan qolsuz bərabərliklə ayrılması üstünlük deyil. Doğma meydanda "Tvente" üçün də çətin olacaq. Bizim üçün daha çətindi. Çünki, istəyirik nəhayət Avropa Liqasının qrup mərhələsinə vəsiqə qazanaq.
- "Qarabağ" pley-off sindromunu qıra biləcək?
- Ümidimiz böyükdü. "Tvente"ylə məsələni səfərdə həll etmək lazımdı. Bu cütün taleyi səfərdə həll olunacaq. Komandamız mütləq qrupa düşməlidi.
- Rəqibin oyununu necə qiymətləndirirsən?
- "Tvente"də yaxşı futbolçular çoxdu. Əksəriyyət gənclər idi. Bununla belə çempionatlar arasında səviyyə fərqi özünü göstərir. Fikrimcə, onlar yaxşı oynadı. İlk oyundan sonra hər iki tərəfin şansları bərabər qalır. Hollandiyada hər şeyi 0:0-dan başlamaq lazım olacaq.
