Millimizin baş məşqçisi: Bizə daha böyük problemlər yarada bilərdilər
13 aprel 2011 18:02
Azərbaycanın ağır atletika üzrə yığma komandasının baş məşqçisi Yanko Rusev azerisport.az saytına müsahibəsində millimizin üzvü Valentin Xristovun diskvalifikasiya olunmasından və digər məsələlərdən danışıb.
- Valentin Xristovla bağlı problemlə bağlı nə deyə bilərsiz?
- Aprelin 6-da Xristov Azərbaycan vətəndaşlığı aldı. Bu isə, onun yığmamızın heyətində çıxış etməsinə şərait yaradırdı. Problem ondan qaynaqlanıb ki, Bolqarıstan Ağır Atletika Federasiyasında rəhbər dəyişikliyi olub. Orda prezident yoxdu və demək olar ki, struktur işləmir. Biz sadəcə onlardan bununla bağlı razılıq ala bilməmişdik.
- Bəs sizin bununla bağlı beynəlxalq federasiyalara göndərdiyiniz xahişlər qəbul edilmişdi?
- Bəli. Avropa Ağır Atletika Federasiyası bizə Xristovun xidmətindən yararlanmağa razılıq vermişdi. Sonradan bolqar tərəfinin də beynəlxalq qurumlara razılığının vacibliyi məlum oldu.
- Qızıl medalımızın qaytarılması realdımı?
- Xeyr. Artıq onu bizə heç kim qaytarmayacaq. Şəxsən mən bu qərara təkzib vermək istəməzdim. Özü də bu çempionat rəsmi xarakter daşımırdı. Əgər bu, Londona lisenziya xarakteri daşısaydı, onda başqa məsələ. Əlbəttə, təəssüf ki, Xristov medalsız qaldı. Ancaq əminəm ki, o, dünya çempionatında uğur qazana və olimpiadaya vəsiqəni təmin edə biləcək. Bolqarlar sadəcə onun burda daha böyük uğurlar qazanacağından qorxdular.
- İdmançı özünü hazırda necə hiss edir?
- Əlbəttə, heç də yaxşı hiss etmir. O ki, dopinqdə ilişməyib və ya özünün burda hansısa bir günahı yoxdu. Yaxşı ki, yığmamızda psixoloq işləyir və hazırda onunla bu yöndə iş aparılır. Komandamız hələ noyabrdakı dünya çempionatında sözünü deyəcək.
- Bəs yığmamızın digər üzvləri niyə Bakıda qalıb?
- Öncə Xristovu göndərdik, ardından isə digər idmançılarımızı yollamağa hazırlaşırdıq. Ağırçəkilililəri yoxlamaq istəyirdik. Yaranan problemlə əlaqədar qərara aldıq ki, ümumiyyətlə bu çempionatda iştirak etməyək. Təşkilatçılar bizə daha böyük problemlər yarada bilərdilər.
