Millimizin üzvü Avropa çempionu oldu
24 avqust 2011 15:50
Polşanın Çexanov şəhərində keçirilən yeniyetmələrin 9-cu Avropa çempionatında birinci günə yekun vurulub. Günün sonu bizim üçün çox gözəl alınıb. Azerisport.az xəbər verir ki, "Zirvə" İdman Klubunun 16 yaşlı idmançısı Paşa İbrahimli, möhtəşəm nəticəyə imza ataraq 56 kq çəki dərəcəsində Avropa çempionu olub.
Anar Qasımovun yetirməsi olan İbrahimli ilk cəhdində 97 kq çəkinin öhdəsindən gəlib. Daha sonra 102 kq və 105 kq çəkini başı üzərinə qaldıran gənc ağırlıqqaldıranımız, birdən qaldırmada qızıl medal qazanıb.
Təkanla qaldırmaya 120 kq ağırlıqla başlayan Paşa İbrahimli bu çəkinin öhdəsindən məharətli gəldi. O, bu çəkini qaldıranda təkanla qaldırmada cəmi üç rəqibi qalmışdı. Yəni idmançımızın sifariş verdiyi çəki artıq medal demək idi. Bu səbəbdən də o, 120 kq-ı qaldırmaqla ən azı bürünc medalı təmin etdi. Ancaq gənc idmançımız bununla kifayətlənmək fikrində deyildi və mübarizəni sona qədər davam etdirdi.
Əsl pəhləvan kimi 125 kq çəkiyə yaxınlaşan idmançımız onun öhdəsindən çox asanlıqla gəldi. Yeganə rəqibi - rus Asali Abdulhaşimovu xeyli qabaqlayan Azərbaycanlı ağır atletimiz 128 kq çəkini başı üzərinə qaldıraraq Avropanın ən yaxşısı adını qazandı.
Bütün altı cəhdinin altısını da uğurla yerinə yetirən və toplamda 233 kq (105+128) çəki nəticə nümayiş etdirən Paşa İbrahimli Avropadakı rəqiblərini darmadağın etdi desək, yanılmarıq. O, ən yaxın rəqibi - gümüş medalçı rus Abdulahşimovdan 9 kq daha yaxşı nəticə göstərdi. Qələbəsinə heç bir şübhə yeri qoymayan gəncimiz Avropanı fəth etdi.
