Yığmamızın heyətində dəyişiklik edildi
6 aprel 2012 02:26
Türkiyənin Antalya şəhərində keçiriləcək ağır atletika üzrə Avropa çempionatına yollanacaq Azərbaycan yığmasının heyətində dəyişiklik edilib. Azerisport.az xəbər verir ki, millimizin liderlərindən hesab olunan Sərdar Həsənov (69 kq) son anda heyətdən çıxarılıb.
Nəticədə yarışda komandamız 4 kişi və 4 qadın idmançı ilə təmsil olunacaq. Onlara qitənin ən möhtəşəm yarışında məşqçilər Nizami Paşayev, Zlatan Vasilyev və Maxsum Xasanov rəhbərlik edəcəklər.
Xatırladaq ki, Avropa çempionatı kişilərlə müqayisədə qadın atletlər üçün xüsusi əhəmiyyət kəsb edir. Yarış onlar üçün London Yay Olimpiya Oyunlarına lisenziya xarakteri daşıyır. Qitə birinciliyində uğurla çıxış edəcəkləri halda, Azərbaycan qadın atletlərinin bir Olimpiya lisenziyası qazanmaq imkanı olacaq.
Qadınların yarışında körpücük üzərinə Silviya Angelova (48 kq), Boyanka Kostova (58 kq), Alyona Kiriyenko (69 kq) və Yuliya Dovqal (75 kq-dan yuxarı) çıxacaqlar.
Kişi idmançıların yarışında isə Valentin Xristov (56 kq), Əfqan Bayramov (69 kq), Namiq Cəlilov (85 kq) və İntiqam Zairov (94 kq) qüvvələrini sınayacaqlar.
Avropa çempionatında Azərbaycanı hakim qismində Vahid Nəzərov təmsil edəcək.
