“Azərbaycan xalqının etimadını doğrultmaq üçün əlimdən gələni əsirgəməyəcəm”
12 aprel 2012 15:26
Türkiyənin Antalya şəhərində keçirilən ağırlıqqaldırma üzrə Avropa çempionatında uğur qazanmış Silviya Angelova Azərbaycan Ağır Atletika Federasiyasının rəsmi saytına müsahibə verib. Azerisport.az həmin müsahibəni təqdim edir.
- Avropa çempionatında uğurla çıxış edərək bürünc medal qazandın. Təəssüratlarını bizimlə bölüşə bilərsənmi?
- İlk dəfədi belə güclü turnirdə medal qazanıram. Həqiqətən çox sevinirəm. Uzunmüddətli, çətin məşqlərdən sonra bu uğuru qazanmaq xoşdur.
- Bu uğurun davamını gətirmək üçün özündə güc hiss edirsənmi?
- Bəli. Məşqlərimi daha həvəslə davam etdirəcəm. Qələbə qazanmaq xoşdur. Bu hissi yenidən yaşamaq istəyirəm.
- Medal qazanmağında kimlərin əməyi var?
- Azərbaycan Ağır Atletika Federasiyasında idmançılara olan münasibət və qayğı yüksək səviyyədədir. Federasiyada rəhbərliyi, xüsusilə də prezidentimiz cənab Cahangir Əsgərova təşəkkür edirəm. Məşqçimə də məni bu uğura daşıdığına görə minnətdaram.
- Azərbaycan xalqına demək istədiyin bir söz varmı?
- Azərbaycanı sevirəm! Bu ölkənin hər bir vətəndaşına təşəkkür edirəm. Onların etimadını gələcəkdə də doğrultmaq üçün əlimdən gələni əsirgəməyəcəm.
