Xristov 8 Avropa rekordunu yenilədi
10 aprel 2013 17:17
Albaniyada keçirilən ağır atletika üzrə Avropa çempionatında qızıl medala sahib çıxan Valentin Xristovun qələbə qazanması gözlənilən oldu. Azerisport.az xəbər verir ki, gənc atlet rəqiblərindən üstün olduğunu hər dəfə sübut edir. Dünənki çıxış da buna bir misaldı.
Belə ki, Xristov 62 kq çəki dərəcəsinin təkanla qaldırma hərəkətində yerinə yetirdiyi iki uğurlu yanaşma ilə birdən-birə 8 rekord yeniləyib. Birinci yanaşmada 170 kq-ı ram edən idmançımız bununla Avropanın həm gənclər, həm də yaşı 23-ə qədər olan idmançılar arasında rekordunu yeniləyib.
Gənclər arasında Avropa rekordu erməni əsilli rus atleti Sergey Petrosyana məxsus idi. O, 15 aprel 2008-ci ildə İtaliyanın Linyano şəhərində keçirilən çempionatda bu nəticəni qazanmışdı. O vaxt 302 kq nəticə göstərən Petrosyan həm də toplamda gənclər arasında Avropa rekordunu müəyyənləşdirmişdi.
Yaşı 23-ə qədər olan idmançıların təkanla qaldırma rekordu da rus Pavel Suxanova məxsus idi. O, 12 sentyabr 2011-ci ildə Rumıniyanın paytaxtı Buxarestdə 163 kq-ın öhdəsindən gəlmişdi. Bu yaş qrupunda toplamdakı rekord isə türk Bünyamin Sezərə məxsus idi. O, 12 aprel 2011-ci ildə Rusiyanın Kazan şəhərində keçirilən Avropa çempionatında 298 kq nəticə göstərmişdi.
Valentin Xristovun birinci yanaşmasında ram etdiyi 170 kq, həm də toplamda 307 kq demək idi. Göründüyü kimi bir cəhdlə bu rekordların dördünü də yeniləyən atletimiz, 175 kq çəkini də rahatlıqla başı üzərinə qaldırdı. Bu isə artıq öz rekordlarının bir daha yenilənməsi demək idi.
