İsgəndər Əsgərov: Diqqətimizi növbəti dünya çempionatına yönəldəcəyik
18 oktyabr 2013 16:28
“Varşavada keçiriləcək dünya çempionatına kiçik heyətlə qatılmağımıza səbəb, idmançılarımızı artıq yüklməməkdi”. Bunu azerisport.az saytına açıqlamasında Azərbaycan Ağır Atletika Federasiyasının icrası direktoru İsgəndər Əsgərov deyib.
Onun sözünə görə, ağırlıqqaldıranlarımız başqa mötəbər yarışlarda da mübarizə aparıblar və yaxşı da nəticə göstəriblər:
“Milli komandamız tələbələrin universiadasında və İslam oyunlarında çıxış etdi. Böyük uğur qazandıq. Belədə, məşqçilər korpusu qərara gəldi ki, bu dünya çempionatında 3 nəfərlə iştirak edək. Onsuz da, Polşa paytaxtında təşkil olunacaq yarış elə də mühüm əhəmiyyətə daşımır.
Biz əsas diqqətimizi Qazaxıstanın Astana şəhərinə yönəldəcəyik. Çünki gələn il keçiriləcək dünya çempionatı Rio olimpiadasına lisenziya xalı verəcək. Ancaq bu o demək deyil ki, Varşavada medala ümid etmirik. Hər 3 idmançımızdan uğur gözləyirik”.
Xatırladaq ki, sözügedən planetin ən güclülərin yarışında ölkəmizi Valentin Xristov (62 kq), Firudin Quliyev (69 kq) və Kristina Yovu (53 kq) təmsil edəcəklər.
Sabah Polşa paytaxtında, həmçinin, Beynəlxalq Ağırlıqqaldırma Federasiyasının konqresi təşkil olunacaq. Toplantıda AAAF-ın baş katibi Yavər Hacıyev, 5-8 dekabrda paytaxtımızda keçiriləcək “Bakı kuboku-2” ilə bağlı 5 dəqiqəlik məruzə ilə çıxış edəcək.
