Almaniya Braziliyaya 7 qol vurub, finala çıxdı
DÇ-2014-də ilk yarımfinal matçı keçirilib və ilk finalçının adına aydınlıq gəlib. Azerisport.az xəbər verir ki, mərhələnin ilk günündə ev sahibi Braziliya “Estadio Mineyrao” arenasında Almaniyanı qəbul edib.
Meksikalı hakim Marko Rodriqesin idarə etdiyi görüş braziliyalılar üçün faciəvi hesabla başa çatıb. Bu mərhələyə qədər oynanılan oyunlara baxsaq, bəlkə də Braziliyanı yarımfinalçılar arasında ən zəif halqa adlandırmaq olardı. Bu qarşılaşmada “sambaçılar”ın bəlkə də iki ən vacib futbolçusu – Neymar və Tyaqo Silvanın oynamaması belə deməyə əsas verirdi. Bu baxımdan braziliyalıların almanlara məğlubiyyətini normal saymaq olar. Amma Avropa təmsilçisinin rəqibini 7 qolla (!) darmadağın etməsini yəqin ki, heç kim gözləmirdi. Almanların bu möhtəşəm zəfəri Yoahim Lövün komandasını ilk finalçı edib.
Qeyd edək ki, DÇ-2014-ün digər finalçısı bu gün keçiriləcək Argentina - Hollandiya matçında müəyyənləşəcək.
DÇ-2014
Yarımfinal
9 iyul
Braziliya - Almaniya - 1:7
Qollar: Oskar, 90 - Müller, 11, Kloze, 23, Kross, 24: 26, Xedira, 29, Şürlü, 69: 79.