Argentina da finalda!
DÇ-2014-də baş tutan ikinci yarımfinal matçı ilə növbəti finalçının adına aydınlıq gəlib. Azerisport.az xəbər verir ki, Braziliyanı darmadağın edərək finala vəsiqə qazanan Almaniya yığmasının rəqibi Hollandiya - Argentina qarşılaşmasından sonra bəlli olub.
Qarşılaşmanı türkiyəli referi Cüneyt Çakır idarə edəcək. Mundial başlamazdan öncə hər iki komanda turnirin favoritləri sırasında göstərilirdi ki, onlar da ümidləri doğruldaraq bu mərhələyə kimi irəlilədilər. Heyətində Yohan Kroyf, Marko Van Basten, Rud Qullit, Frank Raaykard kimi istedadlar olmasına baxmayaraq, hollandlar heç vaxt dünya çempionu ola bilməyib. 1974, 1978 və 2010-cu illərdə finala çıxmış hollandların bu dəfəki rəqibi Argentina da heç də keçilməyəcək rəqib deyil. "Narıncılar" final həyəcanını 4-cü dəfə yaşamağa yaxın idilər.
Argentinaya gəlincə, sonuncu dəfə 1986-cı ildə mundialın qalibi olan 2 qat dünya çempionları 1990-cı il finalından sonra elə də ciddi uğur qazana bilməyiblər. Amma indi mundialın Cənubi Amerikada keçirilməsi və Lionel Messi amili komandanın gücünə güc qatırdı. Qrup mərhələsini Lionel Messinin böyük əməyi ilə keçən amerikalılar 1/8 və 1/4 final matçlarında ardıcıl 2 Avropa komandasını - İsveçrə və Belçikanı eyni hesabla məğlub etdilər. Çox güclü hücum xətti olan Argentina millisinin müdafiə xətti də heç də pis oynamır. Ezekel Qaray, Martin Demişelis, Eduardo Roxo və Pablo Zabaletadan təşkil olunmuş müdafiə xətti onlardan olan gözləntinin əksinə, xeyli inamlı təsir bağışlayırdılar.
Bu iki komandanın qarşılaşmasında azarkeşlər digər yarımfinal görüşündən fərqli olaraq, əsl qol susqunluğunun şahidi olublar. 90, eləcə də əlavə olunmuş 120 dəqiqə ərzində qapılara qol vurulmayıb. Nəticədə penaltilərə ehtiyac duyulub ki, daha dəqiq oynayan argentinalılar finala vəsiqəni təmin ediblər.
DÇ-2014
Yarımfinal
10 iyul
Hollandiya – Argentina - 0:0 (penaltilər - 2:4)